علي فكره سعاد حسني مانتحرتش وُاهين عمره ما كان بالنسبه لها اكتر من استاذ بتحبي السكر كام معلقه ع النعناع ثبّتي وشّك علشان ارسم كل اللي عينيكي ما بتقولهوش.. تفتكري اخوكي اللي بيطلع في مظاهرات يوميا مع مدرسته وبعد اليُفط اللي معلقها علي السلم وف أوضة النوم ممكن يقتنع إن ده كله مش حيرجع ارض فلسطين؟! لو تقدري بكره تيجي لي من الصبح ونقضي اليوم مع بعض ممكن اسلمك اللوحه بعد يومين.. بقالي كتير ما اخدتش اجازات مش عاوز استعجل ع اللوحه واستخدم قلم الفحم مع ان التسريحه الوحشيه بتاعتك مش قادر اقاومها.. رغم انّك فنانة بس انا دايما كنت باقول انك مش ممكن تقفي علي المسرح وتأدي الدور ده تبقي اكيد غلطانه.. لو فاكره إن انا حاقدر اقاوم طول الوقت.. وإيدي حتفضل ترسم بس لسه توتر عينك مش ظاهر ع اللوحه لحد الوقت ريحة عرقك خايف جدا لتروح م الفوطه لو اتغسلت طول ما ملامح عينك مش ظاهره علي اللوحه.. حافضل قلقان.. لو غبتي عليّه المرّه الجايه ما اضمنش البُقع اللي حتظهر في ملامحك.. .............. جبت لك البُن اللي طلبتيه لو بتحبيها زياده.. حاشرب وياكي مش ممكن اصدق إن انا اول واحد.. يكتشف الرقّه اللي ف حركاتك لو كنتي مُصِره تبُصي علي الصور اللي ف البومي اعتبريها لواحد تاني بشرتك السمرا.. خلتني اغيّر اسلوب الرسم بتاعي.. زي ما ببساطه عرفتي تغيري اسمك حاسس وكإني لأول مرّه اشرب قهوه جرّبي وابلعي لقمة عيش الشوكه اللي ف زورك حتروح لو كنتي مُصِره علي التدخين اختاري سجاير مصنوعه هنا وانت بتفترسيني.. بنظراتك بتلغي محاولة لعبك أدوار الطفله حتي لو اتفرجتي يوماتي علي عالم سمسم زيي آسف انّي بقاطعك.. بس ده مش معناه استخفاف بكلامك الدكتور شخّص حالتك بتسرُّع ومكانش المفروض انه يقول لك.. خليكي كده لمّا تعيدي مكياُك ف مراية الحمام اقعدي ويّايه.. واتكلمي عن نفسك حبّه..
