ف كل طلعة شمس زرعت حبة أمل وسِبتها .. تكبر وف كل ليلة زرعت عين وسبتها.. تسهر وف كل شارع زرعت خطوة وسبتها .. تمشي وف كل عين شُفتها زرعت صورتي وسبتها و.. مشيت *** مليان حماس مليان أمل ومش بطل مش هركليز ولا عنترة دنا كل حاجة مكسرة وكل حاجة مِفَتْفتة .. وكل حاجة مبَعْترة *** بدخل علي الأحلام ب صدري لا أَهَاب لا اعمل حساب توهة ولا عتمة واعشق بدمي كما العشق أُنزل وافرد جناحي وارقص .. واغني وابيع دماغي .. لحسن ظني واصدق .. ف وعدي زي ما بيقول الكتاب وأخلص لأملي وللأصحاب وان صابني سهم .. وجرحني مابتهدّش لكن أخاف م النزيف .. وأعمله ألف حساب *** ماشي ولا بس ضحكة بهتانة باصص علي سكتي بنظرة هلكانة عريان .. ومش حران ولا بردان وحزين ..حقيقي .. لكني مش زعلان ب نص روح بحلم وب نص حلم بعيش وياريت متسألونيش عن النص اللي جوايا بالظبط إمتي هيكتمل .. إنسان ؟! *** اليوم طويل جدا والخطوة أقصر م الطريق وإن قلت أرجع ألاقي بكرة مش .. هاين والصدق.. خاين والفرح .. محروم والدنيا سهتني ووقعِت من جيب الجاكيت ال مخروم *** وكل ما تطول المسافة .. يقِلّ الشوف شوقي علي ضهري و.. همي و.. ضحكتي .. وتحت باطي غنوتي .. وبيراقبني الخوف تقلت ملامحي .. عليَّ ولا حد راضي يشيلها عني .. ويخِفّ الوجع وكل ما اخطي خطوة .. فيه حاجة فيَّ بتتولد وحاجة مني ب تُقَع *** من الغرام اكتفيت ب روعة اللهفة ومن السهر ب الضحك ع العتمة واكتفيت ب الزغللة م الضي وب الانتظار م اللي جَيّ ومن اللي فات اكتفيت ب الندم واكتفيت من ريحة الأحلام ب أغنية ومن جميع الناس اكتفيت بيَّ *** كام ألف شمس خسرتها عشان أكسب نهار وكتير رهنت الضي قبل ما اوصله كام ليل ضحكت عليه وما سهرتوش كام سهم صابني ورشق .. كام معركة فاصلة وكام رجوع خايف كام انتحار اكتمل وكام وصول زايف مصدقاني السكك .. ومش مصدقها الأرض شبه السما .. والرمل شبه السحاب .. دي خطوة ع الأسفلت ودي خطوة ع الميّة .. ودي إيه كمان ؟! شمس ولا محبوبة ..عشقها حارق ودي نجوم مِطفيّة ولا دول أصحاب ؟ *** خطوة لِقُدام .. وخطوتين للخلف .. واللي نهيته ببتديه .. تاني شوارع .. وناس.. وبيوت شُفتها بعينيَّ فاتت عليَّ وهي هي بعد شوية بتعدي تاني عمري ده ولا طريق دائري ؟! غرزت في رماله ولا برجع ..ولا بوصل كأني ماشي ..في مكاني *** بالظبط زي عمود كهربا عَميان واقف أَعدّ الساعات في نفس المكان مش قادر اقعد زيكم وارتاح بنام واقف وبصحي ملتقيش لوني فيه حد بيعدي يحفر اسمه علي وشي وحد تاني بيعدي يلزَق علي جتتي إعلان