هاجمت جماعة "أنا آسف يا ريس"، الداعمة للرئيس الأسبق حسني مبارك، تظاهرات الأطباء، عبر صفحتها على موقع "فيس بوك"، مدعية أن تلك التظاهرات مدعومة من جماعة الإخوان المسلمين وشباب 6 إبريل، على حد قولها. وكتبت الصفحة، في بيان لها: "لو نقابة الأطباء شايفة أنه من حقها أنها تنزل في الشارع بالآلاف وتخترق قانون التظاهر وتعطل المرور عشان تعبر عن غضبها من حادث فردى بين أمين شرطة ودكتور، إذا فالناس المريضة دلوقتي اللي حضراتكم سايبنهم في العيادات والمستشفيات بدون دكاترة هما كمان من حقهم يعملوا فيكم أية؟". وأضافت: "لو الأطباء نفسهم شايفين أنه من حقهم أنهم ينزلوا يتظاهروا ويعملوا إضراب عشان مشكلة فردية مع شرطي أخطأ، فالناس اللي أنتو نسيتوا في بطنهم الفوط والمقصات، واللى أنتوا قتلتوهم وسببتولهم العمى بإهمالكوا، دول بقى هما كمان أهاليهم يعملوا فيكوا إيه؟"، متسائلة "لو أنت كدكتور شايف أنك نازل عشان تتظاهر وتعبر عن غضبك عشان مشكلة فردية مع فرد شرطة أخطأ، أمال حضرتك رافع صور محبوسين من الإخوان ليه؟". وتابعت: "لو حضرتك شايف إن نزولك ده مجرد تعبير عن الرأي والغضب ملوش أهداف سياسية تانية، يبقى اشمعنا قناة الجزيرة بتنقل مظاهراتك واشمعنا صفحات الإخوان وأعضاء 6 أبريل كلهم متضامنين معاك ونازلين يتظاهروا جنبك؟، ولو أنت شايف أن من حقك تثور وتغضب عشان حادث فردى بين دكتور وأمين شرطة، يبقى الناس اللي بتطردوهم وبتسبوهم من غير علاج فى المستشفيات عشان ممعهمش حق الكشف يعملوا هما كمان فيكوا إيه؟". واختتم صفحة "أنا آسف يا ريس" ملاحظاتها بالقول: "أخيراً ليه دايمًا أي مشكلة بين أي فرد شرطة وأي موظف في أي مكان بيتم استغلالها سياسيًا وإعلاميًا ضد الدولة، والسؤال هنا هل لو كانت المشكلة دي بين مهندس ودكتور أو بين مدرس ودكتور كانت هتبقى نفس النتيجة؟، ولا هو تربص بجهاز الشرطة و خلاص؟".