ناشد الملحن عمرو مصطفى، جمهوره بدعم كليب "القاهرة" للفنان عمرو دياب والكينج محمد منير، برغم الخلافات بينه وبين الهضبة، مشيرا إلى أن قوى الشر على حد وصفه هاجمت الفيديو كليب. وكتب مصطفى من خلال صفحته على موقع "فيس بوك": "عمرو دياب ومحمد منير قدما مصر بشكل راق وبيتحاربوا، ادعم أغنية القاهرة لأن دى مصر الراقية اللى عايز أشوفها، ادعم أغنية القاهرة لأن كفاية عشوائيات فى التصوير وكفاية بلطجة وكفاية بيئة، ادعم أغنية القاهرة لأن اتنين من أحسن من فى جيلهم قدموا نموذجا ثقافيا محترما، دعمهم أنت كمان دلوقتى واطلب منهم عمل آخر فى الشارع وقولهم نظفوا الشارع قبل التصوير علشان مصر صورتها قدام العالم تتطلع حلوة، ادعمهم لأنهم ولاد بلدك ومدوا أيديهم لبلدهم". وأضاف: "مش وقت نفتكر الماضى حصل فيه إيه أدعمهم لأن قوى الشر زعلت منهم علشان عملوا كده، أدعمهم علشان يكونوا قدوة للأجيال القادمة". وتابع: "الموضوع مش أغنية حلوة أو وحشة الموضوع وطن ومصريين مدوا أيدهم لوطنهم / أدعمهم لأنهم مصريين وطلعوا صورة بلدك بشكل أنا شخصيا فخور بيه".