طالب الدكتور حازم حسني - الاستاذ بكلية الاقتصاد والعلوم السياسية - بعدم المبالغة في التفاؤل بالاكتشاف الذي اعلنت عنه الحكومة مع احدى الشركات الايطالية والخاص بحقل الغاز في الدلتا . وقال حسني في تدوينة : بمناسبة اكتشاف شركة إيطالية لأكبر حقل غاز طبيعى فى المياه المصرية، وبمناسبة فيضان البوستات من نوعية "وشك حلو علينا يا ريس"، ياريت ندارى على شمعتنا لغاية ما الحمل يثبت، وياريت كمان ما نوزعش المغات قبل ما المولود يشرف "بحسب قوله"
وأضاف: الحذر واجب، جايز الحمل يكون كاذب زى حمل ملك الجمل فى مسلسل القاهرة والناس (ده مسلسل تليفزيونى قديم من الستينات معظمكم مش عارفه ... مش مهم) ... مهم ناخد بالنا إن بيانات شركات البيزنس مش دايماً بتكون لوجه الحق والحقيقة ... وما حدش عارف إيه اللى بيحصل فى الكواليس؟ "بحسب رأيه" وتابع : فى كثير من الأحيان يكون الإعلان عن مثل هذه الأمور سببه الرئيسى دعم أسعار أسهم الشركات فى البورصة، أو دعم موقفها التفاوضى مع بلدان أخرى ... خليكوا فاكرين الله يعمر بيتكم إن إعلان شركة أرابتك عن بناء مليون وحدة سكنية كان هدفه من ناحية دعم السيسى فى الانتخابات ومن ناحية تانية دعم أرابتك فى البورصة ودعم رئيسها فى اجتماعات مجلس الإدارة ... وكلنا عارفين إنه لا المليون وحدة اتبنوا، ولا رئيس أرابتك نجح فى إنه يخدع مجلس الإدارة فى بلده "بحسب وصفه" وأنهى كلامه قائلاً: ده ما يمنعش إننا نتفاءل لو حبينا، ولا إننا نحمد ربنا فى كل الأحوال، ولا إننا ندعى من قلبنا إن ربنا يجعله خير... بس سايق عليكم النبى بلاش ضحكة مظهر ابو النجا دى أحسن شكلنا بقى وحش قوى "بحسب رؤيته"