طالب البرلماني السابق، البدري فرغلي، رئيس اتحاد أصحاب المعاشات، جميع أصحاب المعاشات البالغ عددهم 9 ملايين مواطن، بالاستعداد للدفاع عن النفس وحقهم، مؤكدًا أن ذلك حق مشروع لهم بعد أن أهملتهم الحكومات واستولت على أموالهم. وقال فرغلي في لقاء مع برنامج "صح النوم" الذي يقدمه الإعلامي محمد الغيطي على قناة "التحرير: "كل ما عندي هو نداءات لأصحاب المعاشات بأن يستعدوا للدفاع عن النفس، مع أننا أحرص الناس للدفاع عن الوطن". وتساءل: "يعني أسيب ال9 ملايين مواطن لوزير المالية ووزير التضامن، يفترسوهم بتوع البرادعي، أنا لن أخون الناس دي، أنا مش باقي على حاجة، لأني مفيش معايا حاجة، أنا مش هخونهم ولا هبيعهم، وبيقول لهم دي معركتنا الأخيرة، لأننا هنخسر أيه.. الفقر.. ما نخسره". وأضاف "إحنا يوميًا بنتساقط من الفقر والمرض، ومحدش بيطبطب علينا، دا محدش بيقول لنا كلمة فيها رحمة.. دا مستنينا نموت، لأن موتنا يدعم موازنة الدولة.. لما نموت هنخفف العبء.. هو إحنا كنا عبء عليكم؟! لأ دا هما اللي عبء علينا.. هما اللي عايشين على أموالنا وفوائد أموالنا.. إحنا اللي نورنا لكم أبراجكم وبندفع أجوركم العالية.. دا أنتوا بتقبضوا من ورانا.. حرام.. واحد عجوز مريض ياخد 64 جنيهًا". واستطرد: "أنا لما بقول الكلام ده يطلع وزير التضامن يقول ما حصلش، طب كل الناس بتقولك أهو من كل محافظات مصر.. بيبعتوا على الهواء أهو.. إيه اللي بيحصل.. دا أنت بتقتل الناس اجتماعيًا". ووجه حديثه لأصحاب المعاشات قائلا: "أنا بقول لكم.. أوعوا تفقدوا إيمانكم.. خليكم أقوياء.. أنتوا اللي بنيتم السد العالي وأصحاب العبور والصناعات العملاقة في مصر.. إحنا منتظرين فقط الرئيس الجديد لما نشوف هيعمل إيه؟". وتابع: "بيستغلوا ضعفنا وكبر سننا.. مش هو دا الحرام برده.. دا عيون الناس دي فيها قهر.. ما شفتش شفايفهم وهي بتتكلم.. أخون الناس دي إزاي"، وانخرط في البكاء، ما تسبب في بكاء مقدم البرنامج محمد الغيطي أيضا. شاهد الفيديو