* * حسنين : طبعا سمعت عن الفائض . إللى حققه قطاع البترول السنه الماليه إللى فاتت وإللى بلغ 5 مليار دولار . ودا فرق بين قيمة الصادرات البتروليه اللى زادت عن العشرة مليار دولار . والواردات البتروليه اللى بلغت 5 مليار دولار . = = محمدين : ومين قالك إننا صدرنا بترول بعشره مليار دولار . * * حسنين : ياراجل .. تقرير البنك المركزى عن العام المالى 2009/2010 هو إللى قال . = = محمدين : طيب بص شويه شوف العشره مليار دولار جايين منين : أربعه ونصف مليار من تصدير البترول الخام . وأقل من من 3 مليار من تصدير المنتجات البتروليه . وواحد مليار دولار من تموين السفن والطيارات اللى معديه عندنا . وأكثر من 2 مليار دولار من تصدير الغاز الطبيعى . * * حسنين : حتى لو شلنا تمن تصدير الغاز وقيمة تموين السفن والطيارات اللى معديه عندنا . برضه باقى حوالى سبعه مليار دولار من تصدير البترول . . حلوين . = = محمدين : بس إنت ناسى حاجه مهمه محدش بيقولها .. إن قيمة الصادرات دى سواء بترول ولا غاز طبيعى . داخل فيها حصة الشريك الأجنبى . تعرف إن البنك المركزى بتاع دولة اليمن لما بينشر قيمة صادرات البترول هناك . بيحط تحتها نصيب الحكومه اليمينه منها كام ونصيب الشركات الأجنبيه كام . * * حسنين : يعنى إيه ؟ . = = محمدين : يعنى الشركات الأجنبيه اللى بتدور على البترول عندنا . بتاخد حصة تعوض بيها مصاريف الاستكشاف . وبعد ما تخلص مصاريف الاستكشاف . بيكون لها نسبة من الانتاج . إحنا بقى بندخل الحصة بتاع الشركات الأجنبيه جوا قيمة الصادرات . على أساس إنها صادرات طلعت من مصر . بس دى فلوسها رايحه جيب الشريك الأجنبى موش جيب هيئة البترول المصريه . * * حسنين : ودى أد إيه ؟ = = محمدين : طبعا النسبة من الإنتاج اللى طالع بتكون كبيره لما تكون فى مرحلة تعويض مصاريف الاستكشاف . وبتقل النسبه بعد كدا . لكن ممكن تقول إنها حوالى 40 % من الانتاج كمتوسط أو يزيد شويه . * * حسنين : برضه إحنا كسبانين حتى لو شلنا حصة الشريك الأجنبى. لسه عندنا حوالى 4 مليار دولار قيمة صادرات البترول . = = محمدين : خلى بالك إنت لسه بتقول . إن تمن وارداتنا من البترول فى نفس السنه أكثر من 5 مليار دولار . * * حسنين : تقصد إيه ؟ = = محمدين : يعنى معنى كلامك إن قيمة صادراتنا الحقيقيه من البترول . أقل من قيمة وارداتنا الحقيقيه منه . * * حسنين : واحده واحده على .. الله يخليك . = = محمدين : يعنى إن انتاجنا المحلى من البترول الخام ما بيكفيش استهلاكنا المحلى . علشان كدا بنشترى من الشركات الأجنبية الموجوده عندنا انتاجها من البترول الخام . زائد على كدا بنستورد بترول خام ومنتجات بتروليه من الخارج . * * حسنين : بس إحنا بنصدر بترول خام ومنتجات بتروليه . = = محمدين : شوف إرجع لخطة العام المالى إللى إحنا فيه . إللى عاملاها وزارة التنمية الاقتصاديه صفحة 203 . حتلاقى إن إحنا حنستورد فى السنه دى . بترول خام حوالى أربعه مليون طن . ومنتجات بتروليه أكثر من سبعة مليون طن . يعنى حنستورد أكثر من 11 مليون طن خام ومنتجات . * * حسنين : لكن إحنا بنصدر بترول خام برضه . وتقرير الخطة إللى إنت قلت عليه . بيقول إن هيئة البترول ها تصدر خمسة ونص مليون برميل بترول خام بنفس السنه . = = محمدين : شوف ياسيدى برميل البترول الخام متوقع تمنه السنه دى يوصل 76 دولار . والسنه اللى جايه ها يزيد ل 79 دولار . لكن إحنا حنستورد 2 مليون و437 ألف طن بوتوجاز بسعر متوقع 730 دولار للطن . وها نستورد 3 مليون و287 ألف طن مازوت بسعر 675 دولار للطن . وحا نستورد أكتر من مليون طن بنزين 95 بسعر متوقع 710 دولار للطن . * * حسنين : يعنى عاير تقول إن سعر تصدير البترول الخام قليل . أما سعر المنتجات البتروليه عالى . لكن يا حلوا ما إحنا بنصدر بنزين وكيروسين ومازوت . = = محمدين : لو رجعت للتقرير السنوى بتاع منظمة الأوبك لسنة 2009 فى صفحة 55 حتلاقى إن مصر صدرت 166 ألف برميل يومى من الخام والمنتجات البتروليه مع بعض . يعنى حتلاقى تصدير الخام كان 102 ألف برميل يومى . وتصدير المنتجات البتروليه من البنزين والمازروت والكيروسين وغيرهم 64 ألف برميل يومى . يعنى حاجه بسيطه لأن الاستهلاك المحلى بياخد معظم الانتاج . وعلشان كدا بناخد حصة الشريك الجنبى وبنستورد . * * حسنين : يعنى الخلاصه إحنا دوله مصدره ولا دوله مستورده للبترول ؟ = = محمدين : بص فيه جهه عالميه بتحسب بيانات الطاقة فى دول العالم . إسمها ادارة معلومات الطاقة الأمريكيه . لو دخلت عليها على النت وطلعت الفايل بتاع بترول مصر حتلاقى فى الصفحة رقم 6 . إن انتاج مصر السنه الميلاديه إللى فاتت كان 685 ألف برميل بترول يوميا . لكن استهلاكها كان 710 ألف برميل يوميا . يعنى فيه فرق بالسالب 25 ألف برميل يوميا . وحتلاقى جداول بإنتاج مصر واستهلاكها من البترول لأكثر من عشر سنين فاتت . وحتلاقى إن مصر كان فيها فائض بين الانتاج والاستهلاك لحد سنة 2006 . لكن من سنة 2007 وحتى 2009 أصبح الاستهلاك أكثر من الإنتاج . يعينى بقيينا من الدول المستورده . * * حسنين : مفيش حد غير أمريكا نرجع له ؟ = = محمدين : بلاش إرجع لتقرير بيطلعه صندوق النقد الدولى مرتين فى السنه . إسمه الآفاق الاقتصاديه فى منطقة الشرق الأوسط . وبص على تقرير شهر ابريل السنه دى . حتلقيه حاطط مصر ضمن الدول العربيه المستورده للبترول . * * حسنين : ما أنت عارف إن صندوق النقد دا أمريكا هى إللى بتمشيه ! = = محمدين : بلاش .. موش البنك المركزى المصرى قال إن قيمة صادرات مصر من البترول عام 2009 ميلاديه أو حتى بالسنه الماليه اللى فاتت كان أكثر من عشرة مليار دولار . طيب بص على الجدول رقم 1-16 بالتقرير السنوى لسنة 2009 . لمنظمة الأقطار العربيه المصدرة للبترول - أوابك - . حتلاقى فيه إن قيمة صادرات مصر من النفط لنفس السنه 2 مليار و166 مليون دولار . يعنى فرق حوالى 8 مليار دولار بين الجهتين . * * حسنين : مفيش دليل من مصر ؟ = = محمدين : مجلة البترول دى بتطلعها وزارة البترول يعنى رسميه . هات العدد الأخير بتاع شهر اكتوبر السنه دى . وإفتح صفحة 13 . حتلاقى إن استهلاكنا من المنتجات البتروليه . أكثر من انتاجنا من الزيت الخام والمتكثفات فى السنة الماليه إللى فاتت . وللأسف كان تقرير الخطة السنويه إللى كانت بتعمله وزارة التخطيط بيحدد الدخل الحقيقى من البترول . لحد التقرير بتاع العام المالى 2006/2007 وفى الصفحة 108 منه . لما قال إن صافى الفائض بالميزان البترولي المتوقع من البترول يوصل 10 مليار دولار بعد ما شال من قيمة الصادرات . قيمة الواردات البتروليه . لكن التقرير بعد ما قال إن فيه فائض بترولى صافى عشره مليار دولار من التجاره والخدمات البتروليه . قال إنه لو شلنا من الفائض ده : قيمة استثمارات البحث والتنمية . وكمان شلنا قيمة صادرات الشريك الأجنبى . وكمان حذفنا الايرادات اللى بتروح للشركات الإستثماريه وشركات الخدمات . وكمان نقصنا قيمة الأقساط بتاع القروض والفوائد إللى عليها . يتبقى كام من العشر مليارات . يتبقى 762 مليون دولار . يعنى أقل من مليار دولار . واحد صحفى كتب الكلام دا وقتها . بعدها إتصلت وزارة البترول بوزارة التخطيط . ومن يومها متلاقيش موضوع القيمة الصافيه دى فى أى تقرير للخطة السنويه . * * حسنين : يعنى عايز تقول إن إحنا لو خصمنا الحاجات دى النهارده من ايرادات البترول الحصيله ها تقل خالص . = = محمدين : بدليل إن هيئة البترول مديونه . أمال لديه طرحت سندات بالأسواق الدوليه . * * حسنين : بس إحنا بناخد ضرائب من هيئة البترول ومن شركات البترول . دا حتى نسبة الضرائب على شركات البترول حوالى 40 % . يعنى أعلى من النسبة إللى على باقى أنواع الشركات واللى بقت 20 % . = = محمدين : فعلا فى الموازنه بتاع السنه الماليه إللى إحنا فيها . قطاع البترول مطلوب منه يدفع حوالى 36 مليار جنيه ضرائب أرباح دخل . زائد الفائض بتاع هيئة البترول اللى حيوصل 25 مليار جنيه مفروض تاخده الخزانه العامه . زائد ضرائب المبيعات على الشركات زائد الجمارك . زائد حاجه إسمها إتاوه على شركات البترول . المهم حنوصل لرقم إجمالى 67 مليار و680 مليون جنيه . نصيب قطاع البترول من الايرادات اللى مفروض تدخل خزانة الدوله من قطاع البترول . * * حسنين : طب الحمد لله آدى 68 مليار جنيه للموازنه فى سنه واحده من قطاع البترول = = محمدين : عارف كام جنيه ها يدخلوا الموازنه من ال 68 مليار جنيه ؟ * * حسنين : إيه 50 مليار .. أربعين يعنى ؟ . = = محمدين : لا ياحبيبى .. ولا جنيه واحد . ها يدخل خزانة الدوله من قطاع البترول السنه دى . * * حسنين : ليه إن شاء الله . = = محمدين : لأن الحكومه عملت مقاصه مع هيئة البترول . قالت لها موش هاخد منك ضرائب ولا فوائض ولا جمارك ولا إتاوات . مقابل إنك تتحملى دعم المنتجات البتروليه . وطبعا زى ما أنت عارف . الدعم دا بيروح جزء منه للبنزين 92 والبنزين 95 . * * حسنين : يعنى الموظف الغلبان الحكومه تاخد منه ضرائب من المنبع . وشركات البترول ما تدفعش ضرائب ؟ = = محمدين : ياسيدى دا موش كلامى .. إرجع لتقرير لتقرير لجنة الخطة والموازنه بتاع مجلس الشعب عن موزانة السنه دى صفحة 91 . حتلاقى الكلام دا بالتفصيل . وحاجات تانيه توجع القلب . [email protected]