هل هذا هو الإسلام يا عم الشيخ؟ هل هذه هي أخلاق الرسول صلى الله عليه وسلم؟ هل هذا هو ما علمكم الأزهر؟ أين أنت من قول الله:" ولو كنت فظاً غليظ القلب"؟ أين أنت من:" ليس المؤمن بالفاحش ولا المتفحش ولا البذئ"؟ أين أنت من:" وقولوا للناس حسناً"؟ وينسى هؤلاء جميعاً ولا يردون على أي قول أو كلامٍ تم انتقاده على المردود عليهم من أصحاب التصريحات العلنية سواء من الإخوان أو من غيرهم؟؟؟؟ ولما نفكرهم بيها يقولوا: دي مواقف فردية واحنا كلنا معترضين عليها....ومينفعش تحكم علينا كلنا بيها!! طيب يا كباتن فين الاعتراض الرسمي أو حتى الاعتراض الشبابي عليها؟ لا شفنا صفحة باسم الشباب تعلن مثلاً: كلنا ضد تصريحات العريان، أو القرضاوي أو صبحي صالح....إلخ. ولا شفنا بيان من شباب الإخوان بالاعتراض على ما قاله العريان ....إلخ. بالعكس احنا بنشوف تبريرات وتفسيرات وتأويلات وتعليلات...ده لو كان الكابتن متفاعل بأدب واحترام أما العموم الغالب فتلا قي تعليقات من عينة: ومين ده اللي بيتكلم؟ احنا لينا تاريخ نضالي وجهاد عريق!!! انت نسيت 80 سنة من البهدلة والتضحيات؟ انت عايز تمسح ما قدمه الإمام الشهيد البنا، التلمساني، الهضيبي؟؟؟ يا كباتن الله يرضى عليكم أنا لا بمسح ولا غيره!!! غاية ما هنالك أنا أرد على تصريحات حالية للقيادات والرموز الاخوانية وكل ما أتمناه من حضرات السادة الاخوانجية انهم بس والله يردوا على التصريحات مش على أسلوبي أنا اللي ممكن حد فيكم يشوفها مستفزة.. يا كابتن سيبك من أسلوبي المستفز وخليك في سبب الاستفزاز. سيبك من الشكل وخليك في الموضوع...يا عم الأفوكاتو... وياريت برده تسيبوا حكاية الفتنة نائمة؛ لأن اللي أيقظ الفتنة فعلاً هو اللي أصدر تصريحات مش اللي بيرد على التصريحات....! وكمان يا ريت نبطل نغمة: أنت كده بتحارب المشروع الإسلامي!! لالالالالالا المشروع الإسلامي مش مشروع الإخوان ولا الإخوان هما أصحاب المشروع الإسلامي...! مع احترامي وتقدريري لكل الشيوخ المساندين والمبررين والمروجين لهذا الكلام لكن لا وألف لا كلام غلط من هنا ليوم القيامة، والواقع خير شاهد . وكمان بلاش حد يقول: أنت كده بتساند العلمانيين والليبراليين في هجومهم ضد الإسلام... لا معلش أنا مش مع العلمانيين والليبراليين خالص... واللي متابع مقالاتي وقصائدي وخطبي يعرف كده كويس، كون أنت لا تعرف فدي مشكلتك أنت ولا مواخذة مش مشكلتي أنا يبقى روح يا عم الكباتن واقرأ ما كتبته أنا على مدار أربع سنين وبعدين تعالى ناقشني بعد ما تتعرف على منهجي، واسمع خطبي ودروسي من قبل الثورة وتعالى كلمني في منهجي. بالمناسبة كمان: واحد بيقول: من سبقك إلى ما تقول: هو ربنا يا عم الفزلوك قال انتظروا السابقين ولا قال: فاستبقوا الخيرات"؟؟؟ وبكرر بردك كلامي: واللي سبقني مين اللي سبقوا؟؟؟؟ ها ممكن بقى حد يرد على الموضوع؟؟؟؟؟؟ *ابن الأزهر ومحبه الشيخ الشاعر كارم السيد حامد السروي 01120796110 إمام وخطيب بوزارة الأوقاف المصرية [email protected] أرسل مقالك للنشر هنا وتجنب ما يجرح المشاعر والمقدسات والآداب العامة [email protected]