نشر أدمن صفحة "الحرية للجدعان" تدوينة على موقع التواصل الاجتماعي "فيس بوك" تتضمن رسالة من 10 معتقلين في أحداث رابعة العدوية، موجهين رسالتهم من سجن طره. وتضمنت الرسالة المطالبة بالإفراج عنهم أسوة بزملائهم المفرج عنهم بعد حكم المحكمة بالإفراج عن عدد 400 في نفس القضية. ونصت التدوينة على: "من سجن استقبال طره، رسالة من 10 معتقلين على ذمة قضية اعتصام رابعة، محبوسين منذ 35 شهرا رغم قرار المستشار حسن فريد بإخلاء سبيل 400 متهم على ذمة نفس القضية! نص الرسالة: ننتحر لكم ؟! لا نعتقد أن السؤال ده هيفرق مع حد خصوصًا في زحمة المسلسلات الرمضانية لكن عمومًا في قضية مشهورة باسم اعتصام رابعة ورقمها 2985 لسنة 2015 كلى شرق القاهرة, القضية دي لسه محبوس بسببها أبرياء عشرة ما اتورطوش فى أى مخالفة للقانون, ماكانوش بينظموا الاعتصام أو بإقامة دولة ومؤسساتها". ولسه محبوسين للسنة الثالثة على ذمة القضية مع 350 متهما, من ضمنهم عدد بسيط لا علاقة لهم بالإخوان وأتباعهم وأفكارهم, إحنا العشرة ماكناش نعرف بعضنا قبل الحبس ولا نعرف أحد من باقى المتهمين معانا. إحنا العشرة المالناش ضهر وإلا كنا أخدنا إخلاء سبيل مع مئات من اللى خرجوا فى أول سنة حبس وأغلبهم إخوان أو تكفيريين. إحنا العشرة لسه محبوسين في استقبال طره, رغم أن ضباط الجهات السيادية إللى حققوا معانا أكدوا أن التحريات الأمنية كلها بتؤكد براءتنا من أي تورط في عنف أو انتماء لجماعة أو فكر متطرف. لكن إحنا العشرة لسه محبوسين للشهر ال35 على التوالى .. رغم أن المحامى المتطوع معانا أكد أن ورق القضية يؤكد كلام الضباط اللى حققوا معانا, ولكن إحنا العشرة بنتعاقب مع أهلنا وأحبابنا على جريمة الكل عارف إننا ماعملنهاش.. إحنا العشرة لسه جوا الزنازين لثالث رمضان على التوالى..إحنا العشرة محرومين من فرحة العيد مع أهلنا للعيد الثالث على التوالى.. لسه مش قادرين نفهم ليه المستشار حسن فريد ما يديناش إخلاء سبيل, ولا إحنا أخطر من ال400 اللى أخدوا إخلاء سبيل فى أول سنة على ذمة القضية؟! إحنا العشرة لا نشكل خطرا على المحكمة أو الإدلة أو الشهود, وبالتأكيد لا نشكل خطرًا على مصر الدولة أو مصر الشعب أو مصر الأرض.. ليه لسه محبوسين مع ناس قياداتهم بتستغل الجلسات لأغراض سياسية وإعلامية؟! ليه لسه محبوسين مع اللى سمعنا قياداتهم يطلبوا من المحامين بتوعهم إطالة وقت المحاكمة تضييع وقت كل جلسة؟! ليه لسه محبوسين مع اللى بيهربوا من جلسة النطق بالحكم, لأن المحامين بتوعهم أكدوا ليهم ضعف موقفهم القانونى فى القضية وانعدام فرص البراءة والأحكام المخففة فى هذه الجلسة التى تبعد أكثر بسبب مماطلتهم؟! ليه إحنا العشرة مانتمتعش بحق الحرية رغم أننا لا نتبع قناة قطر اللى خرج مراسلها من سنتين وإحنا لأ؟ ليه إحنا العشرة -اللى قاومنا محاولات وإغراءات ضمنا لاى جماعة أو فكر متطرف داخل السجن- نفضل محبوسين وسط الضغوط دى كلها؟ّ! ليه إحنا العشرة مانفذتوش معانا وعود رئيس الجمهورية بخروج غير المتورطين فى عنف أو مخالفة للقانون, ليه الوعود دى ما اتطبقتش علينا رغم تكرارها من سنة ونص؟ ليه إحنا العشرة نتحبس 3 سنين مع ناس تقدس وتسير بدون تفكير وراء كتب إرشادهم أو وراء مستر اكس الجديد اللى اسمه ابوبكر البغدادى؟ ليه مافيش أى فرصة للاستفادة بحد ادنى من العدالة من القضاة أو النيابة أو أى مؤسسة, وعدالة تسمح بوقف السحب على المكشوف من أرصدتنا المحدودة فى بنك الحياة؟! ليه مافيش إنسان واحد فى الدولة المصرية حاطط أولوية تصحيح خطأ وجود غير المتورطين من أمثالنا داخل الزنازين؟ إحنا العشرة محبوسين 3 سنين, يعنى مش خطأ أو هفوة واحدة, ده تراكم أخطاء.. فهل التراكم ده غير قابل للتوقف قبل فوات الأوان؟ ليه إحنا العشرة ركبونا يوم 14-8-2013 عربيات الترحيلات كنوع من كمالة العدد, ليه الكماله لسه محبوسين, وأغلب العدد خرج من سنتين أو أكثر بالتلاعبات القانونية والورق المضروب؟ ليه إحنا العشرة نبقى مجبرين على أننا مانطمعش فى أمل العدالة والحرية وتطبيق القانون إلا لو وصلنا لحافة الهاوية والإشراف على الموت, وساعتها فى احتمال معقول أإننا نلحق فرصة الأفراج الصحى؟! ليه إحنا العشرة الواقع بتاعنا كشف الخيال اللى فى فيلم "احنا بتوع الأتوبيس"؟ ليه إحنا العشرة الممسوكين بالغلط مش شايفين أى محاولة لتصحيح الغلط؟ ليه بقينا بنفكر كتير فى الانتحار؟ ليه ماحدش عنده رد؟! -أحمد رزق حسين حسين (453) -عمرو محمد أحمد زهران(225) -أحمد محمد عبد الله الصفطى(221) -ضياء أحمد عبد الرحمن أبو العينين(127) -إيهاب محمد على الجندى(340) -محمد طه محمود (169) -تامر خميس جمعة صباح (526) -محمد السعيد عبده راجح(166) -محمد السيد عبد الغنى نجم(138) -أحمد محمد أحمد على (187).