جاءنى الشبح بعد غياب طويل متهلل الوجه، منتظرا منى أن آخده بالحضن. لكنى قابلته ببرود جعله يجلس منهارا على الكرسى - (قال فى إحباط): إيه المقابلة الزفت دى؟- (قلت فى صراحة) اسمع يا شبح، إنت بتخلينى أكتب فى مقالاتى كلام خطير وشكلك حتودينى فى داهية - (ضحك الشبح وقال فى شقاوة) إنت من الأحرار يا أيمن - (قلت ساخطا) بلا أحرار بلا ثوار. أنا مش عاوز مشاكل ومن فضلك سيبنى فى حالى - (قال الشبح ساخرا) أنا فاهمك كويس، إنت زى معظم المصريين مستنيين حد يجيب لكم الديمقراطية لحد عندكم - (قلت فى أمل) يا سلام لو أمريكا تضغط على النظام وتخليه يبطل ديكتاتورية! (قال الشبح فى وضوح) الدول، خصوصا الإمبراطوريات الكبرى، مش مؤسسات خيرية، عشان تعطى الشعوب الكسلانة حقوقا لم يدفعوا ثمنها - (قلت فى حيرة) بس أمريكا أحيانا بتضغط! - (قال الشبح فى ثقة) ده شغل سياسة، أمريكا بتلعب على ورقة الديمقراطية عشان تاخد من النظام مكاسب تانية، والحكومة فاهمة ده كويس- (قلت متذاكيا) طب إسمع يا شبح، ماتخليكم جدعان، وتجيبوا لنا الديمقراطية بطريقتكم الشبحية - (قال الشبح فى دهشة) إزاى؟- (قلت فى رجاء) أنتم متواجدون فى اللجان الانتخابية من غير ما حد يشوفكم، وتقدروا تخلوا الانتخابات نزيهة رغم أنف الحكومة. (قال الشبح فى هدوء) تكونش فاكر إن الديمقراطية هى مجرد انتخابات نزيهة؟- (قلت فى حيرة) طبعا، أمال إيه؟- (قال الشبح وكأنه يُلّقى درسا) الديمقراطية أكبر بكتير من حاكم يفرض انتخابات نزيهة، لأن ممكن الحاكم اللى بعده ينكص ويتراجع. المجتمع لا يمكن يكون «ديمقراطى» إلا لو كان تداول السلطة بيمثل ثقافة مجتمع وقيمة أخلاقية لا يُسمح بالمساس بها. لو سألت مواطناً إنجليزياً عن احتمال تزوير الانتخابات عنده حيفتكرك يا بتستظرف يا مجنون، لإن التزوير مش وارد فى ثقافتهم، فهمت!- (قلت محبطا) بالشكل ده لسه بدرى علينا أوى! (ثم متوسلا) إسمع يا شبح، فيه موضوع محيرنى جدا، أنا أعرف إن أوروبا كانت استبدادية زينا، صح؟- (قال الشبح فى هدوء) وأكتر - (قلت والحيرة تقتلنى) هل معقول إن حكامهم تنازلوا عن سلطاتهم المطلقة بالبساطة دى وقبلوا بتداول السلطة؟- (قال الشبح وهو يضحك) ومين قال لك إنهم قبلوا!، ولادة الديمقراطية حصلت عندهم بتضحيات كبيرة. أربعة قرون من الصراعات الدينية والفلسفية والاجتماعية والسياسية والاقتصادية، كانت نارا مولعة لكنهم خرجوا منها زى الذهب بعد امتحانه. (قلت له فى رجاء) أرجوك إحكيلى اللى حصل فى أوروبا بالتفصيل - (قال الشبح وهو يضع رجلا على رجل) طيب اطلب لى ساندويتشين كفتة وحاجة ساقعة عشان أحكيلك بمزاج. (غدا تعرفون كيف أصبحت أوروبا ديمقراطية).
