يا مصر يا أمى، هقولك كلمتين.. جوايا من صغرى.. وفى قلبى من سنين.. لكن وقبل ما أقول.. نصلى على الأمين.. ونمدح سيدنا عيسى.. والكل يقول آمين.. يا مصر يا أمى.. مالك ومال جوك.. راح فين جمال القمر.. وفين دفا شمسك؟.. وفين نسيم الهوا.. على شط غيط قمحك؟.. وسط السحابة السودة.. بقيت يا دوب لمحك.. يا مصر يا أمى.. مالك ومال نيلك؟.. راح فين خيره فى نهارك؟.. وسحره فى ليلك.. دا كان نبع الحياة.. والدلتا تحكيلك.. يا مصر يا أمى.. مالك ومال أرضك؟.. راح فين جمال الندى.. قطرات على وردك؟.. يا مصر يا أمى.. مالك ومال حبك.. مبقاش فى حد ليه.. بيدوب فى هوى قلبك.. دانتى بلد السلام.. ومكرمك ربك.. يا مصر يا أمى.. مالك ومال مالك.. ليه الغنى بيعيش.. قادر قوى سالك.. وليه الفقير بيعيش.. فى ظلام وليل حالك.. يا مصر يا أمى.. خلصت الكلمتين.. اوعى تكونى زعلتى.. أنا مش من الحاقدين.. دانا ابنك حبيبك.. وعلى حالك حزين.. كان نفسى مرة أشوفك.. أيام صلاح الدين! محمد يونس