■ آلو.. معاك يافندم.. والله كل واحد فى موقعه بيحاول ينفصل عن الواقع ويعمل شغله على جنب.. عندك وزير الخارجية شغال تمام ومن غير دوشة ومنظرة.. ورئيس الوزرا الله يكون فى عونه.. شايل شيلة ما يعلم بيها إلا ربنا.. وعمّال يلف بره مصر وجواها يصلح الملفات الخربانة.. والمواطنين الشرفاء مكونين لجان وعمالين يحلوا مشاكل الميه واللى بيشوف الدستور.. يعنى فيه ناس مفحوتة.. والله القمح يعنى عالحُركرك.. والدقيق خلاص بنلحّس فى آخر كيس.. بس هما يشتغلوا يا فندم.. حد قاللهم ما يشتغلوش.. يشغّلوا المطاحن والمخابز والمصانع اللى واقفة دى.. والله يافندم أنا مش فاهم منين أوائل أيام الثورة كانوا هالكينا.. الثورة وقّفت حالنا.. داحنا ناس رزقنا باليومية.. قولولهم يروّحوا بقى عايزين ننزل أشغالنا.. طب أهى راقت والولاد روّحوا.. مانزلوش أشغالهم ليه بقى؟.. أنا عارف؟.. وقفات فئوية واعتصامات وبلا أزرق.. مش عايزين يفهموا إنهم لو ما اشتغلوش لا حايبقى فيه فئوية ولا حد أدنى للأجور ولا نيلة.. مش حانلاقى ناكل كلنا.. لحظة واحدة يافندم.. أصل فيه واحد شكله غريب دخل عليا كده من غير إحم ولا دستور.. مش عارف لابس كده ليه.. عامل زى الكفار بتوع المسلسلات.. نعم؟.. ماله؟.. آه.. يعنى ده لبس السلف الصالح ودى دقنه؟.. أمال الكفار ساعتها كانوا بيلبسوا جينز مثلا؟.. مش نفس اللبس؟.. يعنى ما علينا.. خليك معايا أشوف عايز إيه ده لحسن مكشر وقالب خلقته عالآخر.. قال يعنى هيئته ناقصة غشلقة. ■ نعم يا محترم.. أفندم.. أؤمر. ■ «عايز عبير» ■ إيه عبير دى؟.. ده مشروب جديد أخو فيروز ولاّ إيه؟.. بس إحنا هنا ماعندناش مشاريب يا بابا.. ■ «بقولك عايز عبير.. سيبنالكوا كاميليا وماريان تشبعوا بيهم.. أنا وإخواتى الكتار اللى واقفين بره دول عاوزين عبير وإلا حانطربقلكوا الدنيا.. أَهُم بُص م الشباك وإنت تشوفهم». ■ ياااااه.. كل دول إخواتك؟.. سبحان الله نفس الدقن ونفس النكشة.. إنتوا أكيد باباكوا عامل اشتراك فى التوحيد والنور.. نفس اليونيفورم.. وكلكوا عايزين عبير؟.. دى ماركة أتوبيس أو تُرماى ولا حاجة؟.. ولاّ عبير ده نوع من الدعم مثلا حاتصرفوه ولاّ مركب عايزين تهاجروا فيها ولا إيه يعنى؟.. ■ «لا تراوغ ولا تتلاعب بالألفاظ.. عايزين عبير وإلا ما نبقاش رجالة لو ما ولعنالكوش الكنايس.. واخد بالك؟».. ■ واخد بالى من إيه؟؟.. إنت إيه اللى ف إيدك اللى عمال تشوح بيه ده؟.. ورينى كده.. يا ساتر يا رب.. إيه الذوق العكر ده؟.. حد يشيل ف إيده ودن كاوتش يلعب بيها كده؟.. إيه ده؟.. يا نهار اسود ومنيل.. دى ودن بجد.. ودن بنى آدم فعلا.. إنت معتوه يا بنى؟.. جبتها منين دى؟.. ■ «دى ودن واحد قليل الأدب وما بيسمعش الكلام».. كلام مين؟.. «كلامنا».. كلامكوا مين يعنى؟.. إنتوا تبقوا أبوه ولاّ الحاكم بتاعه ولاّ مين يعنى؟.. وده ماسمعش الكلام ف إيه بقى؟.. «حب واحدة».. ياااااااااسلام؟.. حب واحدة فقطعتوله ودنه؟.. طب الحمد لله إن إيدكوا ما سرحتش على حتة تانية.. والله كرم من أخلاقكوا إن إنتوا اكتفيتوا بودن واحدة.. دى شكلها الشمال.. أيوه أيوه.. أصل الودن الشمال دى كافرة.. زى الإيد الشمال والرِجل الشمال.. الظاهر ربنا خلق النص الشمال ده عشان يتقطع كله.. طب وإخواتك اللى بره دول كل واحد معاه ودن برضه؟؟. . يمكن عندكوا هواية جمع الودان زى طوابع البريد زمان كده.. الواحد فيكوا يتفشخر بقى بالودن اللى معاه.. يقولك أنا معايا ودن صفوت الشريف مثلا والتانى يذلّه بقى عشان معاه ودن مبارك.. طب قوللى يا ضنايا.. والستات برضه بتقطعوا منهم حاجات وتشيلوها كده؟.. ■ «أنت تسخر وتلهو وتعبث بالكلام.. حاتجيب عبير ولاّ أولعلك فى أُم أى كنيسة جنبكوا؟».. ■ آآآه.. إنتوا ما بتقطعوش حاجة م الستات بقى بتاخدوهم على بعض حتة واحدة.. أفيد برضه.. أصل حاتعمل بيها إيه وهى متقطعة جزل جزل.. كده أنا فهمت بقى إن عبير دى واحدة ست.. وعايز عبير واحدة ليك ولاخواتك ولاّ نعبيلكوا عوابير كتير على قدكوا.. وممكن نلفلك شوية برضه تاخدهم للى فى البيت.. تيك أواى يعنى.. ثم إيه علاقة عبير بالكنيسة؟.. يا خبر.. معلش أنا راكن حد كبير على التليفون.. ثانية واحدة. ■ آلو.. ألا لامؤاخذة يافندم.. عندى هنا واحد بيقوللى ياجيبله عبير يا يولع فى الكنيسة.. ده إيه ده سعادتك؟.. رسينى أنا مش فاهم حاجة.. إمم إمم.. الله؟.. ده المفروض ناس زى دى يكونوا كتيبة من اللى بيساعدوا البلد والناس.. كان ممكن ييجى منهم كتير قوى، إخيه على كده.. طب بالسلامة سعادتك بقى.. ■ شوف يا.. «دكتور فلان».. بتشتغل دكتور؟.. «لأ إمام جامع».. وده من إيه؟.. أزهرى سعادتك؟.. «لأ أنا دكتور أمراض جلدية وتناسلية».. وما بتشتغلش شغلتك ليه؟؟.. «عشان الأمراض التناسلية حرام».. أُمال درست طب ليه وكلفت الحكومة سبع سنين تحشى معلومات ف دماغك.. وخدت مكان طالب تانى كان ممكن ينقذله عيان ولاّ حاجة.. ولما إنت أمراض جلدية ما بتعالجش القشف اللى كاسى قشرة دماغك ليه؟؟.. شوف يابنى.. إنت وإخواتك الكتار اللى بره دول.. واضح إن بختكوا مش ماشى مع الستات.. كاميليا وماريان راحوا عليكوا خلاص.. وعبير دلوقتى فى قبضة الشرطة.. تاخد فاتشن؟؟.. طازة ولوز ولسه ضاربة جوزها بالشبشب ومغيره الملة وخالعاه.. طب والنبى طالما بتلموا النسوان الخايبة التايهة دى.. مش ممكن تدوروا عالعيال التايهة من باب الثواب يعنى؟.. أهو العيل من دول حا يرجع لأهله إنما الستات دى حتاخدوها تعملوا بيها إيه؟؟.. طب ممكن تروحوا تدوروا على الستات المسلمات المخطوفين والمحتجزين فى إسرائيل.. ولاّ إمبابة هى اللى على قد إيدكوا بس.. والله إنتوا واقفين عالبلد بخسارة.. كل الرجولة والفحولة والشنبات والدقون والحنجورى ده وعالفاضى.. ما بتتكلموش إلا فى الأمور التافهة وتضيعوا أرواح الناس فى رجليكوا.. مصرين تفهموا الكلام بالمشقلب.. وتفتوا فتاوى مغلوطة ومحصورة فى الشيطان اللى بيعمل بيبى وبول الحمير وعورة المرأة والفالنتاين ويوم ما تتكلموا فى السياسة تقولوا كلام جاهل وتحشروا نفسكوا فى اللى مابتفهموش فيه.. فينتهى الأمر دايما بفضيحة.. ورافضين تفهموا إنكم مرفوضين من عامة الشعب بكل أطيافه.. بيخافوا منكم وبيكرهوكم جدا.. ■ إنتوا مش ممكن تكونوا أبناء السلف الصالح.. لأنكم أسوأ دعاية ليه.. مصرين تشوهوا منظره.. مع إن الناس كلهم بالطبيعة منتميين للسلف الصالح.. من غير مظاهرة الجهل والعنف والكراهية دى.. إنما الحق يقال.. اتضح إن ليكم فايدة واحدة فقط.. إنكم أثبتم بالدليل القاطع وبنسبة مية مية.. إن الدولة لازم ولابد تكون مدنية.. آدى كارت واتحرق.. اللى بعده. [email protected]
