نبتدي اجتماعنا بدقيقه سكوت ... ومش عايزين صوت ... كل واحد فيكم هنا مربوط ... وده كلام مظبوط ... ويفتكر كل حاكم ازاي كان عايش مبسوط ... على حساب شعب مكبوت كل واحد فينا ... حيحكي حكايته لينا ... ويسمعنا و يشجينا ... كنا فاكرينها دايمه اتارينا فينا الي اتشال من الباترينه ونفسيته مكسوره وحزينه ... و فينا الي حايحصلنا و مسيره يجينا ونبتدي بالي اتشالوا ... وحاندي لكل واحد فرصته و مجاله الرئيس الهربان : انت يا هربان ... انتوا حتبدأوها بيا طيب اسمع يا فنان ... سرقت سنين طويله وعايش في امان ومطفح الشعب الكوته كمان ... ولا كان حد دريان ... وبدي لاهلي الياقوت والمرجان ... والناس مش لاقيه وحالهم تعبان ... قولت وانا مالي المهم ان انا فرحان ... واقل واحد في عيلتي من الاعيان ... وصحيت يوم على بركان واتقلب للشعب كيان وقالوا عليا جبان ... خفت الصراحه وجريت هربان وصدروا مالي ومال عيالي ... وجابوا واحد بدالي ... واديني قاعد بلالي وبندب حالي ... ومستني الي حايجرالي الرئيس المخلوع : وانت يا ريس ... انا الصراحه مش كويس ... كنت قاعد متيس ... وسايب بلدي وشعبي لعيال بتهيس وجابوا ناس مش معروفه ... عايشين في بلاد محدوفه ... اللي طبال ودي حاجه معروفه ... واللي ديونه بالزوفه ومقولكش على الحراميه ... والي بيحميهم بلطجيه ... والي ماكنش بيغير الجلبيه وعشته بقت مرتاحه و هنيه ... والشعب مش لاقي الفول والطعميه خلاصه الكلام الشعب قام ...وثورات على مدار ايام ... باقوم وانام على كلمة يسقط النظام ... والنبي ده حرام نزلتلهم ظابط ببندقيه ... بلطجيه بسكاكين محميه ...وجمال وحصنه ورجعتهم للجاهليه ... ومجبش نتيجه يا عنيه وفي الاخر يا جماعه ... شكلي حاعيش في مجاعه ... وحاشحت في الاذاعه وشالوني من مكاني... وبيحاكموا كل ظالم و جاني ... واديني اعد بعاني الرئيس المسروع : وانت يا سيدي ... لا انا مش بايدي ... حكمت اربعين سنه بمبادئي وتقاليدي والدنيا معايه نعناع ... ولا في معارضه ولا صداع ... كنت للبترول بياع واديهم كل عشره دينار شوية ارباع ... والنبي مش ابداع وفي يوم عجيب ... لاقيت الشعب غريب ... وقام عليا حتى القريب قلت لا لازم اجيب ... المرتزقه للتأديب ... ونزلتهم في الشارع بالترتيب يقتلوا شعبي الحبيب ولسه الثوره شغاله ... يا عالم هناك بالحاله ... شكلي حتشال زي الرجاله ولا حرجع احكم تاني ... عارف انها اماني ... والشعب مش راجع ومش حيسبني في مكاني ... واديني اعد بجز على سناني الرئيس المعاند : وانت يا جبار ... لا انا محتار ... كنت اعد في الدار ... ومخبي كل الاسرار ومكنتش متخيل يحصل انفجار ... وفجأه لاقيت كله طار ... واتجمعوا في انتظار اني اطلع على المطار ... واحاول اغيرلهم في الافكار ... وهم يقولوا مش ماشين الا لو هو غار ... واديني بينكم عين في الجنه وعين في النار ... وشكل ليلتي مش طالع لها نهار ... وربك هو الستار الرئيس المالك : طيب انت بقى ليه ... والنبي ماعرف يا بيه ... محدش قال انا جيت عليه ايوه فلوسهم معايا بالدينار مش بالجنيه ... طيب اعمل ايه ... منا لازم اخد الي في اديه ونزلتلهم بوليس ... وخليت الي نزل تعيس ... بس الشعب عنده اصرار على التغيير يا عريس واديني جيت ... وسبت البيت ... وحبيت اشوف احولكم بس ياريت ... ما كنت جيت شكلها في الاخر حانقعد كلنا جنب الحيط الرئيس الوارث : انا بقى اصغر واحد فيكم ... ومش حقارن نفسي بيكم ... ما انا عملت حاجات كتير ومسكت بدل الكبير ... واديت الناس بالتقطير ... ووريتهم وقت مرير اصل انا شرير والمفروض يشكروني مش عايزيني اطير ... طيب هاتوا تبرير حسيت الامور حاتوسع ... وحاسيب الحكم وراسي حاتلسع روحت حابس ناس ... وقتلت من غير احساس ... وطيرت كل راس بس بردو الشعب قايم ... ليل ونهار مش نايم ... واخرتي حسيبها طاير او عايم واديني جتلكم صايم ... وشكلها مش باقية لنا ما ربك هو الدايم وننهي اجتماعنا بدعوه جماعيه ... في طلعه فجريه ... مانتفضحش الليله ديه واستر علينا دا احنا حكام فقريه وشكلها سنين علينا مش معديه
