مش عارف ليه دايماً بنحب نختصر و نلخص مشاكلنا فى كلمتين و ساعات نختصر انجازاتنا كمان .... اختزلت ثورة الشعب فى ثورة الفيس بوك و مشاكل مصر فى الرئيس حسنى مبارك و شباب الثورة فى الاستاذ وائل غنيم و الخيانة فى كنتاكى و الوطنية فى ميدان التحرير يعنى لو الناس دى مكانش عندهم نت و استخدموا التليفون المحمول هتبقى ثورة التليفون المحمول او لو استخدموا البريد الالكترونى هتبقى ثورة الايميل ؟ و برضوا عشان المعارضة العامية بقول ان ده مش معناه ان الفيس بوك مكانش ليه تأثير قوى و قوى جداً كمان بس فى الاخر ده موقع تواصل الكترونى طلع نزل هو موقع على النت و الفضل الاول و الاخير فى الثورة للشعب و الشعب كله مش الشباب بس ولا اى فئة بعينها و عشان نوضح اكتر نراجع سيناريو الثورة على السريع ... ابتدينا من خالد سعيد الله يرحمه و الصفحة المعروفة كلنا خالد سعيد و بدأ الشباب يتلموا حولين فكرة مواجهة الظلم و الى كانت واضحة عندنا اوى بالنسبة للجميع لان 90% من الشعب اتعرض لاضطهاد من الشرطة بشكل او باخر و المجال مفتوح لضرب الامثال من اول التعذيب لحد سوء المعاملة و كبرت الصفحة و خرجت مظاهرات بعد كده بشكل متوالى على فترات ثم جائت ثورة 25 يناير الطاهرة ناس كتير نزلت و محدش كان مصدق ان الثورة دى هتنجح و كانت الناس بتزيد و فى ناس كانت بتروح تتفرج تحس ان فيه امل تعتنق الفكرة و بدأت الناس تزيد و اخطأ النظام خطأه الاخير بمحاولة ترويع الثوار بالقتل و هو ما ادى الى عصيان عام مع مؤامرة فتح السجون المعروفة فانهار جهاز الشرطة و انقسم الشعب الى ثوار و حراس .... ثوار بميدان التحرير و المحافظات الاخرى و حراس لبيوتهم من البلطجية و اللصوص و جيش امين هو من حافظ على استمرارية الثورة و ان شاء الله يوصلنا لتحقيق العدل و الديمقراطية فى مصر و كانت الثورة تاتى على شكل موجات الى الميدان التحرير و تزايدت الاعداد الى ملايين فى ايام الجمعة و طبعاً كل حزب سياسى و جماعة كان ليها ممثلين فى الثورة و معارك طاحنة عشان محدش يتكلم باسم الشباب و لا احد يقفز على ثورتهم و لا ننكر دور الاخوان المسلمين فى تنظيم المتظاهرين و خصوصاً يوم موقعة الجمل و ما بعدها و الممثلين و العلماء كل الناس نزلت الميدان ...... كل ده و فى الاخر بقت ثورة الفيس بوك ؟؟!!!!!!! طبعاً مش هنتكلم عن الرئيس السابق عشان كل الناس عارفة هنقول ايه فا ملوش لزوم التكرار بس من نفس المنطلق لازم نواجه كل ظالم و ده الى بيحصل دلوقتى فى كل مصر و الى بيطلق عليها مظاهرات فئوية و دى طبعاً من الاختزالات لان هذه المظاهرات امتداد لثورة الشعب و هى طبيعية جداً ... بالعقل يعنى 20 مليون نزلوا فى الثورة عاطلين ؟؟ اكيد نسبة كبيرة من الناس دى مظلومة فى شغلها و طافحين الدم و بعد ما خلصوا على الرأس الكبيرة ابتدوا يدوروا على بقية الروؤس و دى حلها البداية فى الاصلاح و محاسبة الفاسدين و تحديد اطار زمنى عشان الناس تهدى. الاستاذ وائل غنيم بقى مسئول جوجل فى الشرق الاوسط قال من الاول انه مش بطل و لا يدعى بطولة بس الناس برضوا مصرين يعملوا منه بطل و صفحات لتفويض وائل غنيم للتحدث باسم الثورة و طبيعى فى ناس معجبهاش بقت فيه صفحات لعدم تفويض وائل غنيم و صفحات تانية عايزينة يبقى وزير و ناس تطلع تقول ده عميل و و و و ..... فى ايه يا بشر .... الراجل جزء من الثورة زى ما كل واحد فى الشعب جزء من الثورة بس مش هو الثورة ...... الثورة دى بتاعت الشعب و سببها الظلم و الاستبداد و الفساد طوال 30 سنة مالوش لزوم ندى لكل حاجة اكبر من حجمها و نركز كده عشان احنا محتاجين مجهود الشعب ده كله عشان نعوض خسارة 30 سنة فاتو و نأسس لمليون سنة قادمة ان شاء الله.