كشف عمر جابر، لاعب نادي الزمالك، للمرة الأولى الأسباب الحقيقية وراء رفضه المشاركة في مباراة إنبي، في استاد الدفاع الجوي. وقال «جابر» في مداخلة هاتفية لبرنامج «هنا العاصمة» على قناة «سي بي سي»، مساء الاثنين: «وإحنا في الأتوبيس، كان فيه ضرب غاز وقنابل مسيلة للدموع، كانت حاجة صعبة جدا، بعدين حاولنا نفتح باب الأتوبيس وقعدنا نجري بسبب الدخان، ومش عارفين رايحين فين، جات مدرعة أخدت اللاعبين». وأضاف: «بعض الأشخاص قالولنا محدش مات وكانت اشتباكات وانتهت، ودلوقتي بقى خرج زملائي في الفريق وبيشتموني، فأنا بقولهم أنا مسامحكم ومش هشيل من حد ومينفعش ازعل منكم». وأوضح: «أنا صحيا ونفسيا مكنتش هقدر ألعب المباراة، اللاعيبة بتقول إن عمر كان عارف إن فيه ناس ماتت، لكن لا أنا قررت عدم لعب المباراة وأنا في الأتوبيس بسبب مشهد قنابل الغاز والدخان». وأكد: «لو كنت أعرف إن فيه حد مات كنت هقول لباقي زمايلي في الفريق، لإني عارف إنهم رجالة ومكنوش هيلعبوا، والحمد لله الأهلاوية والزملكاوية بيحبوني، وبطلب من الجمهور يسامحوا اللاعبين». وخاطب الجمهور قائلا: «بقول للجمهور بعد أذنكم مش تشتموا لاعيبة الزمالك لأنهم رجالة». وأشار إلى أنه أبلغ الجهاز الفني للفريق بعدم قدرته على لعب المباراة بسبب حالته النفسية والصحية، مضيفا: «أنا قولتلهم مش هلعب فلما دخلت الأوضة كام لاعب أخدوني وقالولي الجماهير جايين من الأقاليم علشان نفرحهم، وإن شاء الله محدش هيموت، وبعض اللاعيبه باسوا رأسوا علشان ألعب، وأنا نزلت التسخين وحاسس إني في حلم مش في ماتش، كنت دايخ وأيدي بتترعش، أخدت حقنة قبل التسخين لإني كنت حاسس هيغمى عليا». وأكد :«أنا قولت للدكتور حالتي عاملة إيه قبل الماتش، وأخدت حقنة علشان مكنتش حاسس بنفسي، ورغم كده الحقنة معملتش حاجة فيا، والجمهور قعدوا يشتموا اللاعيبة علشان بيلعبوا الجمهور بعدها شجعني، وقولتلهم علشان خاطري محدش يشتم اللاعبين، لأنهم لو كانوا متأكدين أن فيه روح ماتت مكنوش هيلعبوا». اشترك الآن لتصلك أهم الأخبار لحظة بلحظة
