عزيزى المواطن: انا عارف انك متفق معايا على ضرورة تحديث الأدوات التقنية للبحث الجنائى ومكافحة الجريمة ومساعدة رجال الشرطة على منع الجريمة قبل حدوثها زى ما بنشوف في دول العالم المتقدمة، ومتأكد برده انك نفسك ان اسلوب التعليق من الرجلين والايدين في الاقسام عشان انتزاع الاعترافات لازم ينتهى عشان كدا انت موافق على أي نظام علمى حقيقى وتكنولوجى ممكن يساعد الشرطة في دا وأنا موافق معاك، دا لا خلاف عليه مشكلتنا مع موضوع ( القبضة الالكترونية ) إن القصة تخطت كل اللى فات ودمرت حقوق الخصوصية اللى مفروض الدستور بيكفلها، ولو راجعت كراسة الشروط اللى تم نشرها بخصوص شراء نظام التجسس والمراقبة الجديد هتعرف ان الداخلية بتقولك ( أنا قرينك يا مواطن وهتروح منى فين وراك وراك ) عزيزى المواطن: هما قرروا يعرفوا انت بتقرا مقالات لمين وبتعلق عند مين وبتعمل كام لايك وبتدخل على صفحات مين وبتشوف صور مين وايه اللى بيعجبك وايه اللى مش بيعجبك وعشان هما خايفين على مزاجك النفسى هما برده هيعملوا حصر تراكمى يشوفوا ذوقك اتغير ولا زى ما هو لو عملت لايك خد بالك دا ممكن يكون دليل اتهام ليك وتتعكش ولما يسألوك تهمتك ايه هتقول ( جاى في لايك ) ولو عملت برده ريتويت حتى لو مش موافق على الكلام دا وبتعمله ريتويت للسخرية منه ممكن تهمتك تبقى نشر ( الأفكار الهدامة ) وطبعا هما بس اللى يعرفوا يعنى الافكار الهدامة ومدى خطورتها لو شيرت مقال خد بالك يبقى المقال دا بيعبر عنك وكأنك انت اللى كاتبه وممكن تبقى تهمتك برده ترويج الافكار المؤثرة على المجتمع والدعوة للتفكير ودى في حد ذاتها جريمة دلوقتى ( انت بتشغل مخك؟ تبقى رجل خطر بكسر الخاء ) لو اتهورت وعملت كومنت دا أكيد أخطر دا معناه إنك متفاعل وإيجابى وممكن تدخل في دايرة الناس المؤثرة اللى هما بيدوروا عليهم عشان يعملوا لهم قضية تنظيم شبكى بتهمة التأثير، أما لو كنت كاتب – لا قدر الله – فانت كدا خلاص محسوم مصيرك لإن كل كلمة بتكتبها هما بيفسروها بدماغهم وبيعملوا ليك منحنى بيانى لكل مقالاتك على مدار الشهور والسنين هيشوفوا بيه مدى ولاءك للسلطة ومدى نقدك ليها وطبعا كل ما تخرج عن الخط يبقى انت بتقرب من دايرة ( أعداء الوطن ) وانت عارف دول بيروحوا فين ! عزبزى المواطن اوعى تقول ان القصة دى معناها عودة نظام مبارك انت كدا بتظلم مبارك ونظامه اللى دماغهم ما وصلتش أصلا انهم يفكروا فيك كأنك سمكة أو قوقع جوا حوض السمك اللى صاحبه بيشغل النور ويفضل يبص على السمك فيه 24 ساعة عزيزى المواطن هتلاقى مواطنين وطنيين ( من الوطنية اياها ) هيقولوا انتم خايفين ليه؟ هو انتم ارهابيين؟ الكلام دا معمول عشان نحارب الارهاب ولازم تقفوا مع البلد، وكل دول العالم فيها أنظمة تجسس ومراقبة زى دى! من غير ما ترد عليهم بألفاظ ولا أصوات، ابقى اسئلهم كام سؤال عن بعض البنود المكتوبة في كراسة الشروط كعينة بأرقامهم : 21- يدعم النظام إمكانية إعطاء المستخدم القدرة على التعرف على رواد النقاشات ذات العلاقة بالموضوع أو المواضيع المرصودة إلكترونياً. 22- يدعم النظام إمكانية إعطاء المستخدم القدرة على التعرف آلياً على الأشخاص المؤثرين في الموضوعات المرصودة. 24- تقديم خدمة لتتبع مقالات الكتاب عن طريق تجميع المقالات عبر فترات زمنية سابقة مع إمكانية عرض المقالات القديمة للكاتب ومقارنة تباين الآراء مع تغير العامل الزمن 49- إمكانية ترتيب حسابات شبكات التواصل الاجتماعى الخاص وتجميعها حسب ما يناسب البرامج والمبادرات المعلوماتية. 50- إمكانية نشر المحتوى (سواء كان نصاً أو صورة أو مقطع فيديو، أو مقطعاً صوتياً) بشكل متزامن على أكثر من شبكة من شبكات التواصل الاجتماعى. 53- إمكانية جمع المتابعين، والمعجبين، والأصدقاء المرتبطين بحسابات المستخدمين بالشبكات الاجتماعية وإضافتهم في قوائم خاصة في النظام، وفى حال توافر معلومات تفصيلية عنهم لاحقاً يستطيع النظام ربط معلومات وجهات الاتصال الخاصة بهم ببعض يا ترى هيردوا عليك ويقولوا ايه ؟ عزيزى المواطن: طبقا للمعلومات المتوفرة – واللى محتاجة تأكيد رسمى- فان نظام المراقبة والتجسس الحالى على التليفونات بيتيح متابعة 400 ألف مكالمة في نفس الوقت ولأن النظام دا بقى قديم واحنا بنحارب الارهاب ولازم نحدث انظمتنا فالكلام المتناثر ان النظام الجديد هيبقى ببصمة الصوت يعنى تتكلم ارضى هتتجاب تتكلم موبيل مش هتفرق تعمل ناصح وتروح تدور على أي كابينة ميناتل تكون لسه شغالة برده مش هتعرف دا بالبصمة يا حبيبى ! عزيزى المواطن: الجنرال الطيب حبيب العادلى كان راجل واضح وشفاف وقالها بكل شجاعة وبساطة: كل حاجة متراقبة واللى يخاف ما يتكلمش! شفت بقى كان راجل طيب ازاى ومش بيلف ويدور ويعمل حركات ولا يجيب محللين يطبلوا ولا مهللاتية يبرروا عشان كدا لازم تدعى للراجل الطيب دا ان ربنا يفك كربه عشان الراجل دا كان بيقمعك بس بيحترم عقلك ومش بيشتغلك ! عزيزى المواطن: انت هتدفع ضرايب وهما هيشتروا بيها اجهزة وانظمة يتجسسوا بيها عليك، فخد بالك لو انت شاب رومانسى وحبيب اوعى تعمل لايك على صورة حبيبتك اللى خنقاك وبتسيبها وبعد كدا تروح تعمل لايك لصورة البنت اللى انت ناوى تخطبها، هتتجاب هتتجاب باللايكات دى وهتبقى وقعتك سودا، لأنك مش عارف ممكن بكرة يبقى في خدمة متاحة لكل مواطن انه يطلب تقرير اسبوعى أو شهرى على كل حركة أو نشاط انت عملته على أي موقع وساعتها اللايك مش هينفعك أما أنت عزيزى الزوج فليلتك مش فايتة انت مش كفاية حصار البيت واللعب في موبيلك وايميلك أحيانا، لا يا معلم دى مراتك هتحط رجل على رجل وتشوف حد قريبها واصل وتقوله هاتلى تقرير جوزى عشان قلقانة منه اليومين دول ويا ليلك وسواده اللى هتشوفه في عز النهار وانت عارف اللى بيحبوا يخدموا كتير! أما حبيباتى الأمهات إنتم طبعا هتصقفوا للموضوع دا وممكن تغنوا تسلم الايادى عشان الدولة هتساعدكم في تربية عيالكم وهتنبهكم لو عيالكم طلع ليهم رأى أو بيتكلموا في السياسة عشان تمنعوهم من صغرهم وتخلوهم يركزوا في برامج المسابقات وممكن الطبخ أو أي حاجة تانية ممكن يكون فيها قلق عزيزتى السلطة الحالية في مصر: بعد كل الهزار اللى فات إنتى أكيد بتهزرى أكتر، إنك تصرفى كل الفلوس دى والناس مش لاقية كهربا وناس تانية بتدور على لقمة عيش في صناديق الزبالة وأى نظام هتعمليه العيال العفاريت بتوع الفيس بوك وتويتر هيقدروا يتخطوه ويضحكوا عليه، وكله بالعلم برده اللى بقى مجانى في كل مكان، إحنا عايزينك تحمينا بس تحترمى خصوصياتنا كبنى آدمين وما تفرضيش وصاية على اللى خلفونا وكأننا ميكروبات مجهرية لازم تتحط تحت الميكروسكوب، وعلى فكرة الارهابيين ما بيكتبوش على المتفجرات متفجرات وما بيكتبوش على الاغتيالات اغتيالات ممكن يكتبوا (جملات أو عواطف أو سنية) وأكيد هما ليهم شفرات، اللى هناخده من القبضة الالكترونية بتاعتكم إن العيال بدل ما بتلعب على النت براحتها وبتنفس وتهيس مع نفسها في العلن هيطلع ليهم وسواس وهيعيشوا دور ( رأفت الهجان ) و( خالتى بتسلم عليك) وهيخترعوا سين للكلام بينهم وكل شوية هيغيروه ومش هينوبك إلا تضييع الفلوس وحرقة الاعصاب عشان اللعب مع العيال اللى دماغها طقة دى مفيهوش مكسب الجيل دا محدش هيعرف يدخله القفص، الجيل دا اللى عايز يستفيد بيه ويبنى البلد يديله الحرية ويثق فيه ويسيبه ويشوف هو هيبنى مصر ازاى، الجيل دا هو اللى هيحارب الارهاب بجد بالعلم والحرية وتعميق الانتماء للبلد لما يحس ان اللى بيحكموها بيحترموه
