الله يجازيك يا خال.. ربنا يسامحك يا أستاذ عبدالرحمن الأبنودى.. أنا اللى اتعمل فيا بسبب المقال اللى كتبته الأسبوع اللى فات وكان بعنوان «أنا وعبدالناصر والأبنودى» ما اتعمل فى حرامى اتمسك فى مولد.. طيب أعمل إيه ما أهو أنا بحبك وبحب أشعارك، طبعا بتسأل إيه اللى اتعمل، أقولّك.. خد عندك اتصل بى الصديق العزيز الدكتور حسن شوكت التونى وقال لى أنا عاوز أعرف انت بتحب عبدالناصر ليه وأنا أختلف معك فى ذلك.. قلت: أنا لى أسبابى الخاصة وأهمها أن فقراء المصريين أمثالنا ما كان لهم أن يدخلوا المدارس وأن يتعلموا ما لم يكن عبدالناصر جعل التعليم مجانيا، خاصة أن أهلى ليسوا إقطاعيين، مثل ملايين المصريين.. فقال: أختلف معك، فعميد الأدب العربى الدكتور طه حسين هو من قال التعليم مثل الماء والهواء، فكان ردى: ولكن عبدالناصر جعله مثل الماء والهواء فعليا. أما صديقى وزميلى المتماهى الأستاذ جمال الجمل فتوقف عند جملة «أحب عبدالناصر ولكنى لست ناصريا».. قال وهو يضحك ضحكته التى تجعل عينيه تنغلقان، لدرجة أنك تتوهم أنه لا يراك.. تبقى «ناصرى» وهو يهز راسه وكلهم بيقولوا كده.. وحاولت مرارا وتكراراً أن أقنعه بما كتبت إلا أنه لم يقتنع إلا بما فى رأسه. أما عما فعله القراء فحدث يا خال ولا حرج، فمقالى عادة يتكون من جزءين.. الأول هو ما أريد أنا أكتب عنه والثانى كلمة منفعة تحت عنوان «المختصر المفيد»، عادة تكون حكمة أو قولاً مأثوراً، ويبدو فى المرة السابقة أنها كانت «قولا مكسورا» لأن الغالبية اعتقدت أنى أهاجمك حينما قلت: «إن كنت حكيما فأنت حكيم لنفسك وإن استهزأت فأنت وحدك تتحمل». وأنا برىء من هذا براءة الذئب من دم ابن يعقوب، لأن بعض القراء بخاصة الذين يحبونك ربطوا بين المختصر المفيد وجملة الله يجازيك يا عم عبدالناصر وافتكروا أنك بتشتم الزعيم وميعرفوش إن الواحد لما يقول «الله يجازيك يابا جوزتنى بت عمى».. مش معناها إن الواحد مننا بيشتم أبوه ولكنها جملة استحسان، زى ما واحد بيقول لواحد «الله يخرب بيتك يا فلان».. وما بالك بالزعيم.. طبعا عبدالناصر مش عادل إمام. عموما يا خال عاوز أوريك عينة من اللى كتبه القراء على الموقع الإلكترونى بتاع «المصرى اليوم».. خد عندك الأستاذ على مبارك كتب التالى: «من حق الأخ شارل أن يحب ويكره كما يحلو له، ولكن عند الكتابة عن التاريخ والسياسة، فالأمور تقاس بمحصلة مجموع الأعمال التى تمت فى العصر اللى بتتكلم عنه، ولسوء حظك، عصر الزعيم الأوحد كان خداعاً بالشعارات الرنانة، انتهى ب«وكسة وخيبة تقيلة» لم نعرف حتى تاريخه الخروج منها. عمرك سمعت فى الدول المتقدمة واللى اتقدمت إن أى حد من الشعب قال أنا باحب الرئيس فلان ولا علان؟ اللى حاصل إنهم بيقيموا محصلة الأعمال، وعلى أساس ذلك بيعاد انتخابه لفترة واحدة تالية، وبعد كده ترتاح بره الحلبة، وكل واحد عارف تماما إنه خارج بعد فترة أو اتنين بالكتير, وعلشان كده لا يصابون بجنون العظمة ومرض الألوهية بتاع فرعون، وصاحبك برك على دماغنا 15 سنة، وأصبحت سُنّة من بعده. شفت صاحبك عمل فى البلد إيه؟ وإذا كنت مازلت بتحبه، وده حقك، فأرجو ألا تتكلم فى السياسة والتاريخ، وممكن تكتب فيه شعر بس فى صفحة الفن والأدب، وليس فى صفحة الرأى. شفت يا خال اللى بيحصل رغم إن عبدالناصر زيه زى أى بنى آدم بيغلط. بص يا خال كفاية كده وكل سنة وانت ومصر طيبة. المختصر المفيد لسه اللى بيبيع أمته كسبان وكل يوم أطلع أنا الخاسر. [email protected]
