كوته للمرأة.. كوته للاقليات .. كوته للبيزنس ! .. يا كتر كواكيتك يا بلد الحدوتة باخت قوي .. وبقت رخمة.. وكل واحد على هوى الغرب .. وليه مصلحة في أنه ينور كده ويظهر على الساحة في مصر، تلاقيها نازلة ضغوط وتجنيد للأخوة أتباع السيد جورج واشنطن-الدولار- وأديها مقالات وبرامج . وبما أن المرأة هي أساس المجتمع والأسرة .. يكبر بيها .. ويوطي بردوا بيها .. عشان كده هما حطوا المرأة المصرية في دماغهم بقالهم مدة كدة .. وطبعاً الطبقة الحاكمة عايزة تثبت أنها متقدمة وبتتحرك بمصر نحو الرفاهية والجنة الأرضية، اللي الشعب فيها تمام .. ومرحرح .. وقاعد بيهوى على .... ركبه. عشان كده بدأوا بابرز الأمور اللي بتؤرق وتتعب الشعب المصري المكافح ليل ونهار، الختان !! .. صورة البنت الغلبانه والحلاق الأهبل في المولد فرحان أنه طلع في التلفزيون، وهات يا شتيمه في المجتمع الفوضوي المتخلف اللي بيقطع من لحم البنات .. أعز ما تملك !! سابوا دي وراحوا على مسألة حق الست في أنها تخلع من الوحش الآدمي - أحنا الرجالة - .. وجندوا علماء وصحفيين وهات يا إعلام .. على نغمه أريد حلاً .. والحمد لله ..طلع القانون . قال يعني هوا ده اللي حيدي المرأة حقها ويخلي عندها كرامة - إذا كان الشعب المصري كله ما عندوش كرامة جوه بلده وبراها- . خلصنا من دي ولفوا من الناحية التانية .. على كرسي ليها في مجلس الشعب، كده .. وإذا كان عاجبك ..وطبعا حيكونوا من رجالة الحزب .. عفوا ستاته، واللي بالتأكيد حيكونوا على شاكلة السيدة الوزيرة اللي باست أيد حرم الرئيس مبارك في مؤتمر الحزب الأخير.....علنا. أنا نفسي اعرف حاجة .. دلوقتي يا خويا كل مجموعة ليها أو ملهاش لازمة في البلد .. بيتعمل لهم كوته أو مقطوعية أو تخصيص متفصل عليهم بالقانون او بالعافية، ده حتى أخوانا الشواذ عايزين ليهم كوته !!! السؤال بقه ؟ أمتى بقه ربنا يكرم الشعب المصري .. اللي هو الناس اللي زيي وزيك .. اللي أبوهم لا كان لواء .. ولا عمه وزير .. ولا قرايبه في السلطة، أمتى حد كده ياخد باله منه ويعمل له كوته .. في أي حتة .. مش حنطمع ونطلب مجلس الشعب ولا الشورى .. ولا المجالس المحلية .. ولا الشعبية .. ولا الشرطة ولا القضاء .. عشان دول بقوا من المستحيلات .. .. بس .. بس .. أي كوته .. في أي حته . أمتى حد ياخد باله منه ؟!!! شوفوا بقول أنا أيه ؟ حتى أنا مستنى حد ييجي ياخد باله .. أمتى أحنا بنفسنا .. ناخد بالنا بقه من نفسنا ونجري ورا حقوقنا . أقولكم .. ال 3000 سنة مش حتفرق كتير لما يبقوا 4000..
