الوضع كالتالى: دفعتنى حماستى الوطنية إلى الذهاب لبيت رئيس الجمهورية لإقناعه بعدم الترشح وإفساح المجال للبرادعى. وهناك لم أستطع مقابلته ولكنى فُوجئت باستقبال دافئ لم أكن أتوقعه من أقرب مساعديه إليه، والذى وعدنى بهدية تناسب مستواى الفكرى والثقافى الذى سيتضح له بعد الحوار. من مصلحتى إذن أن أشحذ مواهبى لأنال إعجابه. قال فى لهجة جادة: - والآن تكلم، عاوز تقول إيه للريس؟ تنحنحت وقلت: بخصوص الهدية.أأأ قصدى بخصوص البرادعى أنا شايف إن فترة حكم الريس اللى طالت ثلاثين عاما كافية، إذا كانت خيرا فقد أخذنا منه، وإن كانت شرا فقد اكتفينا به. ولازم- مع احترامنا لتاريخه الوطنى- إننا ندى الفرصة لقيادة جديدة لها فكر جديد. (مبتسما) طب والريس؟، يروح فين؟ (قلت فى جدية تامة) يستريح. يستمتع بالسن الجميل «sweet age» كما يُسمّيه الأجانب. كلنا بنحلم باليوم ده بعد ما نؤدى رسالتنا. يجلس فى حديقة قصره يستمتع بالشمس وحب الناس، يتمشى فى الجنينه ويقرا جرايد وينبسط عاوز الريس يقرا جرايد وينبسط؟ (قالها وهو ينظر لى فى فضول) آه (قلتها مبتسما) (وقد اتسعت ابتسامته) طب واحنا نروح فين؟ تستريحوا انتم كمان (وهو يهتز من الضحك) ونقعد فى الجنينة نقرا جرايد وننبسط؟ آه (قلتها وأنا أضحك) ونسيب هنا؟ (قالها وهو يكركر من الضحك) آه تسيبوا هنا (قلتها وقد فطست من الضحك) طب أنا حاسألك سؤال، بس إوعى تكدب أحسن تخش النار(قالها وهو يحرك سبابته فى وجهى ضاحكا) افترض أن دخلك فى الشهر ألف جنيه، وفجأة جاتلك شغلانة بعشرين ألف جنيه فى الشهر وجه حد ياخدها منك، حتعمل فيه إيه؟ (على الفور دون تفكير) حأقطّّعه. الرزق مفهوش هزار. يا واخد قوتى يا ناوى على موتى. طب افترض أن شغلانتك بتجيبلك أكتر من كده بكتير! دى مسألة مبدأ: عض قلبى ولا تعض رغيفى.(ثم خبطت على جبهتى وقد فهمت مغزى سؤاله) أخ فهمت. أما أنا غبى بصحيحََ!!. السلام عليكم. وعليكم السلام ورحمة الله وبركاته(وهو يفتح درج مكتبه) وآدى يا سيدى الهدية اللى وعدتك أنها حتناسب مستواك الفكرى. وأخرج بالونة راح ينفخها ثم ربطها وناولنى الخيط. خد البالونة دى بس إوعى تطير منك، وده يا سيدى (وهو يناولنى كيس ورقى مغلق) بمب عشان تفرقع وتنبسط، وده لبان بس إوعى تبلعه(قالها محذرا وهو يدسها فى فمى) لما تزهق منه إبقى (تفّه). مع السلامة وابقى سلم لى على البرادعى يا حبيبى.
