اتصلت بى صديقتى قائلة «كل سنة وانت طيبة بكره عيد الحب، يا ترى ناوية تجيبى إيه لجوزك السنة دى؟» قلت مش عارفة لسه بس أول ما قفلت التليفون قررت إنه يكون عيد حب محصلش ونزلت تانى يوم اشتريت ورد أحمر مش عارفه ليه لازم يكون أحمر بس هو ده اللون اللى بيقولوا إنه بيعبر عن الحب وطبعاً البلد فى اليوم ده كلها بتكون أحمر فى أحمر وكأنه يوم الحصبة العالمى المهم بعد الورد اشتريت كمان كرافت وبعت له رسالة على الموبايل «أروع القلوب قلبك.. وأجمل الكلام همسك.. وأحلى ما فى حياتى حبك.. كل عيد حب وانت حبيبى» طبعاً الرسالة دى علشان زوجى العزيز يفتكر إن النهارده عيد الحب. شوية ولاقيته باعت رسالة «حبيبتى حضرى نفسك الساعة ستة علشان نخرج» يا سلام يا سلام هو ده الكلام ولا بلاش على طول بعت الأولاد لماما وكنت جاهزة الساعة ستة بالضبط ركبت العربية مع زوجى العزيز وراح مشغل شريط هانى شاكر وشيرين «أنا قلبى ليك أنا روحى فيك من كتر حبى بخاف عليك» يا جمال الحب وسنينه وقعدت أفكر يا ترى إحنا رايحين فين وسرحت مع الأغنية وفجأة لاقيت زوجى العزيز بيهزنى يلا إحنا وصلنا لقيت نفسى قدام بيت حماتى. اتصدمت قلت هو احنا رايحين فين وكان رداً لم أتوقعه «أصل يا حبيبتى لما بعتيلى الرسالة الصبح افتكرت إن النهارده عيد ميلاد ماما فجبت تورته علشان نحتفل بيها» طبعاً كان نفسى أولع فى التورتة وفى نفسى بس قلت مش مشكلة يمكن جوزى حبيبى عاملى مفاجأة بعد كده. خلص عيد الميلاد الحمد لله على خير وركبنا العربية ولاقيته بيشغل شريط الست أم كلثوم قلت يا سلام مفيش أحلى من أغانى الست الرومانسية ورجعت أسرح فى المفاجأة اللى عاملها زوجى العزيز «يلا يا حبيبتى إحنا وصلنا البيت اطلعى» استغربت! «هو انت مش طالع معايا» رد زوجى العزيز «أنا هاسهر مع صحابى هو انت ماسمعتيش الست وهى بتغنى «أعطنى حريتى أطلق يدى» ومن وقتها وأنا باكره كل اللى بيفكرنى بحاجة اسمها «عيد الحب».
