■ حلوة يابلدى يامصر ياغالية ..ياأجمل صورة كانت فى عينى.. كنتى زمان منصورة وحرة.. مليانة عطف وحنية.. لكن اليوم أصبحنا فى غابة.. وبنتنشأ ع الحرية.. دى بيوتنا صبحت زنزانة.. وجيوبنا فاضية وطوية.. والناس ف الشارع زهقانة.. والأسعار بتزيد بالميه.. حلوة يابلدى لما نلاقى.. الناس عطشانة ومفيش ميه.. حلوة يابلدى لما نلاقى.. الميه تجيلنا بالعربية.. حلوة لما نلاقى اللحمة.. متعلقة حمرا ومضوية.. حلوة لما نلاقى جيوبنا .. فاضيه خالص من النقدية.. حلوة يابلدى لما نلاقى.. الفول غلا ومفيش طعمية.. حلوة لما نلاقى مدارس.. فاضيه خالص م التربية.. حلوة لما نلاقى الحب.. ح يملا قلوبنا والحرية.. ولما المصرى يلاقى كرامته.. مش متهانة ومش منسية.. ف أروبا والدول العربية. محاسب / مدحت سبيع وادى النطرون - بحيرة ■ سألونى بلدك مين؟.. قلتلهم مصر.. قالولى حضاره وتاريخ واصل وفصل.. سكت ندمت وقلت وبوحت.. فينك يا مصر لما كنتى عظيمه .. سابوكى ليه لما بقيتى نهيبه.. الكل ياخد ويغرف م الخزينه.. من غير حساب ولاحتى تأديبه.. فينك يا مصر لما كنتى حضاره .. سابوكى ليه لما بقيتى منهارة.. لاصحه ولا تعليم ولا حتى تجاره.. فيكى النفاق والفهلوة شطاره.. فيكى الفطاحل يلفوكى ف سجاره.. وفيكى اللى يخدك ويطير ف طياره .. قوليلى يا بلدى يا ام الطهارة.. غضب ربك عليكى منك ولا م الجاره. كريم مصطفى ■ بادعيلك تعدى أزمة هذا العصر.. بادعيلك فى كل صلاة عصر.. تخرجى من هذا العسر.. أصل بلدنا بقى فيها أكتر من مليون قصر.. وكمان ناس عايشين فى القبر.. والشعب لا يملك الا الصبر.. وبقى فيها (كامبوند) مالهوش حصر.. بقى فيها فساد من القدم للراس.. بقى فيها تعليم لايدخل رأس.. وكل شوية كام حادثة قطر.. وتوك توك نزل كله فى شهر.. بقى فيها ناس نازلين هبر.. عشان محدش عايز يقول كده هَدر.. لمال بلدنا إللى عليه أحكام بالحَجر .. لو مسددناش ديونا ع الفور. . حتى الضرايب بيدفعوها بقدر.. والقرارات بتتاخد برمى الزهر.. والمدرسين ماخدوش الكدر.. والعمال حاسين بالغدر.. لان مصنعهم ممكن يتباع فى سوق العصر.. واحنا لينا مين غيرك يا مصر.. وإن شاء الله هييجى النصر.. وكفاية كده قصور.. والحمد لله الذى أحيانا بعد أن أماتنا وإليه النشور. هشام عبدالحميد محمد ■ باحب فيك المدينة.. جوه عنيك الجميلة.. خلف الأسوار الحزينة.. باحب فيك المدينة.. وسط الحارات القديمة.. جوه الجوامع والكنايس العظيمة.. باحب فيك المدينة.. بكل الحكايات والتفاصيل.. ومعانى حب الأساطير.. ورغم اللى فيك من تناقض واختلاف.. بين موضه وماضى فات.. باحب فيك المدينة.. وأه يامدينتى.. ياكل حياتى ودنيتى.. نفسى أعيش معاكى.. تمسحى دمعتى بإيدكى.. على الطرقات.. فى ليالى البرد.. وشوارع متكحله أسفلت.. ياخدنى جمالك.. اللى مالوش حل.. وقلبى فى حبك داب ولا مل.. وآه يامدينتى.. ياكل حياتى ودنيتى.. ياللى ذكرياتك من ذكرياتى.. وعنيكى منوره الإشارات.. تصحى لهيب الذكريات.. أندم معاها على ساعات.. قضيتها بعيد عنك فى عمرى اللى فات.. وباحب فيك المدينة.. جوه عنيك الجميلة.. خلف الأسوار الحزينة.. وسط الحارات القديمة. حامد أحمد محمد سليمان ■ هو الوطن مصر.. والا العرب حصر.. والا الوطن مكان.. مكان ماتكون يكون؟؟.. هو الوطن بيهون .. لما يكون مسجون.. ولّا الوطن غالى.. وعمرة فى يوم مايهون؟؟.. أخرة وطنك حدوده.. ولّا حدود الشرق.. أخوك جدودك جدوده.. ولّا انتو بينكم فرق.. ومين بينكم غريب.. إللى مالهوش الحق.. ولّا اللى عشان تعيش.. بيقول للظلم لأ؟؟.. هو الوطن عربى.. ولّا الوطن مصر.. ولّا وطنك مدينتك.. ولّا بيتك وعيلتك.. ولّا الوطن فرد.. وانت لوحدك وطن؟؟.. هو الوطن إيه؟؟.. سؤالى رد عليه.. احترت ونفسى مرة.. ألقالى وطن. على جلال كاشف [email protected]