مسحراتى مصر البهية اصحى وسبح رب البرية مشيت ارتل وانشد واجوّد وصوتى يجرى بين النواصى هنا بانقر.. هنا باعوّد هنا باحوّد عن المعاصى لو كنت بحرى لازم اقبّل وان كنت قبلى.. لازم أبحّر ولحد آخر نفس ف صدرى هاشد قلبى وتر واسحر يا مصر قومى وشوفى نيلك يا مصر قومى وضمى سينا نهر المحبة بينتمى لك يا مصر شوفى احنا فين رسينا مصر البهية.. بالعقل هية ف الذكر آية.. ف العشق غية اصحى وسبح رب البرية.. مسحراتى ومشيت ف ضى فؤاد وسيد.. ف كل حى لولا اللى رايح.. ماكانش جى لولا اللى راحل.. ماكانش حى ولولا صوتهم.. ماكانش حسى يطوى دروب الليالى.. طى فؤاد وشاعر.. حداد وصوفى بالحب رتب أول حروفى طير حمامى وسكن عطوفى نزلت بحره مليت كفوفى من الزمرد.. من التمرد شربت منه.. وسقيت ضيوفى يا عم سيد يابو الليالى مكاوى عطرك من مكة غالى عودك فتح لى بيبان خيالى صوتك سمح لى أوصل علالى نورَّت قلبى وسهَّلت صعبى قربت نقصى من اكتمالى لولا اللى رايح ماكانش جى لولا اللى راحل ماكانش حى ولولا صونهم ماكانش حسى يطوى دروب الليالى.. طى فؤاد وسيد ونور خيالهم مزيكا طايرة ف سما جمالهم حافظ عملهم.. ومين سمالهم حيوا معايا خطوة نضالهم صبوا عبيرهم فى ورد عمرى وفوق كلامى.. نقط عسلهم فؤاد وسيد ماشيين يغنوا قلبى وروحى لما اطمأنوا خدوا.. وردوا للشعب فنه ولا باعوا روحهم.. ولا تمنوا غير غنوة تستر يوم الغلابة وغنوة تمسح عرق اللى أنوا فؤاد وسيد ماشيين بهمة ف حى الأزهر.. ولا الأئمة من غير عباية.. ولا حتى عمة لكن فنونهم قد المهمة الأرض تنطق.. كلامها عربى والشعب واحد.. اصحى يا قمة لولا اللى رايح ماكانش جى لولا اللى راحل ماكانش حى ولولا صوتهم ماكانش حسى يطوى دروب الليالى.. طى مسحراتى ف الذكر هايم والنسمة حلوة ولا حد نايم والكل صابح معانا صايم ف الفجر يدعى ويقول يا رب رمضان يا أكرم الشمس ذاتها أرواحنا عندك تبدأ حياتها والنفس راضية تلحق ما فاتها تطلب هداية وتقول يارب المصرى بنا وفلاح وجندى وعندى جامع.. وكنيسة عندى الرحمة من دا.. والحب من دى ومن قلوبنا بنقول يا رب