كتب عمرو حسين ربنا يديم العِشرة... المشهد القادم من خيال الكاتب وأى قارئ يشعر بتشابه بين هذا الحوار الخيالى والواقع تبقى مشكلته هو ... فيلم "حتى آخر العمر" مشهد/253 نهار-داخلى قاعة إجتماعات كبيرة - أهلًا بيكم فى بيتكم ومع أخواتكم، إحنا هنا علشان نخدمكم، جايين نعرف كل طلباتكم واللى أنتم عايزينه يتنفذ فورًا... يالا بقى وفى الآخر أنا حأسيبكم تقولوا أنتم قد إيه بتحبونا ونرسم كلنا قلبين وسهم ونمضى... - ده كلام جميل سعادتك، أهم حاجة دلوقتى الطوارئ، دى خلصت خلاص من يومين، ده حتى الإعلان بتاعكوا أنتم اللى بيقول كده... - بس كده، ولا يهمكوا، إحنا مش عايزين إلا كل خير ليكم، إعتبروا الموضوع ده خلص، خلاص إحنا حندرس الموضوع ده... - أيوه حضرتك بس ده موضوع منتهى... - أه ما هو منتهى طبعًا إحنا بس حندرس إننا نطبقه بس على بعض حالات البلطجة والإرهاب يعنى بس... - بس حضرتك بلاش الإستثناءات دى... أصلها بتفتح الباب... - يا راجل متقولش باب، أنتم بس عارفين إن الوضع مش مستقر فى البلد اليومين دول... - طيب خلاص مش مشكلة الإرهاب والبلطجة، بس نعتبر الموضوع ده خلص... - يعنى ممكن المخدرات والسرقة بالإكراه وقطع الطريق وشوية حاجات بسيطة كده يعنى....عمومًا سيبوا الموضوع ده علينا... *** - عايزين إيه تانى...؟ - عايزين سعادتك خريطة طريق واضحة للفترة الإنتقالية... - أكيد أكيد يدينا ويديكم طولة العمر.... شوف يا سيدى، إحنا نعمل إنتخابات مجلس شعب الأول، وبمنتهى النزاهة والشفافية... - كلام رائع سعادتك... - وطبعًا علشان الشفافية عايزة وقت، لازم إنتخابات على مراحل... - طبعًا أكيد، نقول 3 شهور؟؟ - يا راجل بأقولك نزاهة وشفافية، أنت عايزنا نرجع للعصر القديم ولا إيه...؟؟ قول 6 شهور... - مش كتير يا أفندم؟؟ - كتير إيه بس، المهم الشفافية...أنا بأقولكم شفافية...كله على عينك يا تاجر... - طيب خلاص كده وبعد 6 شهور نعمل إنتخابات الرئاسة؟؟ - لأ إستنى عندك، وفين مجلس الشورى؟ إدينى شهرين كمان شورى... - ولزمته إيه الشورى أصلًا؟؟ بس يا أفندم إنتخابات الرئاسة كده حتتأخر قوى...كده 8 شهور!! - صبرك بس.. الأول نريح شوية وبعدين بقى فيه إجتماع مشترك وإنتخاب لجنة تأسيسية و... - كل ده لسه؟ ولما تيجى اللجنة التأسيسبة خلاص ننتخب إحنا الرئيس؟ - لأ طبعًا، مش لما اللجنة تحط الدستور ونوافق إحنا على اللجنة والدستور ونستفتى عليه الناس الأول؟ - يا أفندم ماهو ممكن مادة واحدة متعجبش الناس ونعيد الموضوع كله تانى... - بالضبط، ولو حصل الموضوع ده ننتخب لجنة جديدة وتحاول اللجنة الجديدة تحل المشاكل اللى فى دستور اللجنة الأولى، لحد ما نوصل لصيغة توافقية... - بس يا أفندم دى عايزة حوار مجتمعى و... - طبعًا، طبعًا...إحنا عايزين دستور يرضي كل المصريين ونفخر بيه كلنا...ولا لإيه؟ - بس يا أفندم ده موضوع ممكن ياخد سنة أو أكتر... - إحنا ورانا إيه؟ أهم حاجة نشتغل صح لمستقبل البلد... - طيب و لما الشعب يوافق على الدستور، خلاص ننتخب الرئيس الجديد؟؟ - بالضبط، أول ما الشعب يدى الأوكى، نفتح بقى المجال للمرشحين اللى لسة على قيد الحياة إنهم يرشحوا نفسهم... وبراحتهم بقى، ممكن نعملهم حملة إنتخابية قد سنة ولا إتنين، وندرس برامجهم كمان، هو إحنا أقل من أمريكا؟ *** - طيب خلاص بقى أنتم طلبتم حاجات كتير قوى وإحنا عملنا كل اللى أنتم عايزينه، ممكن طلب واحد بقى لينا؟ - إتفضل حضرتك... - وثيقة المبادئ الدستورية اللى إحنا حنعملها توافقوا عليها وكمان اللجنة وأسس إختيارها إحنا حنقولكم عليها... - بس يا أفندم اللجنة دى ممكن يكون فيها حد منكم وناس من كل التيارات وده حيخلى اللجنة نفسها تاخد شهور وسنين فى خلافات على ما يتفقوا على مشروع دستور... - يعنى كل الطلبات دى ومش عايزين توافقوا على طلب واحد صغير لينا؟ ده عدل؟ - طيب خلاص يا أفندم ماشى... - يالا بقى وفى الآخر أنا حأسيبكم تقولوا أنتم قد إيه بتحبونا ونرسم كلنا قلبين وسهم ونمضى... - ربنا يديم المعروف با أفندم... - ربنا يديم "العِشرة" يا إبنى... ***