- هناخد الأسانسير؟ = مش عارف.. - إيه احتمالات إن النور يقطع دلوقتي؟ = هو كان قاطع من ساعة إلا تلت.. - يعني لسه قدامنا تلت ساعة نلحق نطلع = لا مش ضروري.. - تفتكر لو قطع علينا في الأسانسير ممكن نموت؟ = آه فيه احتمال نتخنق..لازم نوفر أوكسجين..لازم نشتري أنبوبة أوكسجين..ساعتها مش هتفرق يقطع ولا لأ - تمام..وهنحتاج مية.. = أكيد.. - ونجيب أكل = آه مولتو وشيبسي وحاجات تكفّي ساعة ونص ع الأقل. - وإضاءة = شاحن موبايلك؟ - يعني هو 50% دلوقتي = مممم...محتاجين نشحن - طيب برضو ضروري نكلم أهالينا نقولهم إننا طالعين بالأسانسير وخلال ساعة لو معرفوش يوصلوا لنا ييجوا ويحاولوا ينقذونا = بالظبط..فكرة حلوة - نكتب كمان على فيس بوك..الزيطة على السوشيال ميديا بتوصل للإعلام وممكن تخلي المسئولين يتحركوا لو حصل حاجة.. = تمام تمام.. - تعالى كمان نسيب ورقة مكتوب فيها إننا هن.. *النور يقطع* = هنضطر نستنى ساعة. - آه =مش عارف ليه لما النور قطع ارتحت..أنا في حياتي عموما مش شخص مغامر.. - وأنا كمان #وده نفس الحوار اللي بيدور في دماغي كل يوم قدام باب الاسانسير