امبارح قولت أعمل فيها واحدة ست واستغل فرصة اني حامل وكدهون وأروح للدكتور اتطمن على صحتشي وصحة المفعوص الصغير، وبما إني ساكنة جديد في المنطقة سألت أكتر من حد قالولي مفيش غير دكتور فلان ده آخر شطارة قولت على البركة سألت عن ميعاد العيادة، وسحبت الأستاذ جوزي وروحنا على العيادة وهناك يا مؤمن بعد أول خمس دقايق لقيت نفسي بقول عن أهلي ما تابعت وولدت ولا اتجوزت، الدكتور المحترم عنده زحمة السنين والتنين ليه بقي اقولك اصله في اليوم ده عامل تخفيض على الفزيتة اه والنعمة كانت ب 50 بقت ب 45 وجموع الشعب العريضة جت تستفيد بالعرض !! طيب ماشي زي بعضه، في طرقة كده بتوصل لأوضة الكشف واقف فيها طااااااااااااااااابور طويل بس مش طابور ستات ده طابور رجالة !! انا من كتر ما لقيتهم مصممين على الوقفة افتكرتهم هم كمان حوامل؟! وجايين يتابعو قوم ايه طلع انهم واقفين كده عشان الدور الله هو م احنا بنحجز وناخد رقم اه بس هم واقفين عشان أما كل محروس يسمع اسم المودام يعمل زي عوض أبو شقفة ويقول افنددددددددددددددددم.. طيب ماشي زي بعضه الستات الحوامل بقي عاملين حاجة لتشطيفة قوي، كل واحدة جاية العيادة وجايبة معاها جوزها عشان يقف في الطابور امها عشان تتطمن عليها، وكمان جايبة معاها واحدة صاحبتها تسليها أثناء الإنتظار بالرغي وجايبة فوق البيعة 4 عيال ال هما ولادها طيب ياللي تنشكي في كرشك اللي معاها العيال ي كلها تحمل تاااااااااااااااني ليه هيورثو الخيبة يعني ومسيبتهمش مع أمك ليه لا أصل ماما جت معايا عشان تتطمن عليا ليه ياختي جاية تمتحني ثانوية عامة ايشحال لو مكنتش دي الطلعة الرابعة، أبوكو لأبو الدكتور لأبو الخلفة واللي بيخلفوها..