البنت: صباح الخير ياماما هتفطرينا إية النهاردة؟ الأم: هو احنا لسة فتحنا عنينا؟ دا حتى النهار لسة ماطلعش البنت: عاوزين أكل كتير ياماما دا احنا صايمين! الأم: ماهو علشان صايمين ارحمي دماغى شوية الابن: صباح الخير ياماما هتفطرينا إية النهاردة؟ الأم: ماقلنا لسة حتى النهار ماطلعش دا انتوا لسة حتى ماهضمتوش السحور الأب: صباح الخير كل سنة وانتوا طيبين..با قولكوا من دلوقتى قولوا كل طلباتكم أجبها وانا جاي من الشغل علشان مافيش حيل أنزل تاني الأم: جيب عيش وفراخ ومكرونة وكنافة الأب: متأكدة إنك مش محتاجة حاجة تانية؟ الأم: استنى كدة اما اشوف..أهة نسيت.. هات معاك كمان زبادي ولمون وفاكهة ولو فيه حاجة تاني هابلغك بالتليفون الابن الصغير: (قايم يدعك في عينيه) ماما هو المغرب هيأذن إمتى؟؟ الأم: اللهم طولك ياروح.. لسة بادرى ياحبيبي
** صمت لمدة 3 ساعات*** الأم: قومى ياحبيبتي علشان تجهزي معايا أكل الفطار ماهو أنا ماقدرش أطبخ لوحدى البنت: يوووو ياماما مش قادرة اطبخي أي حاجة الابن: أي حاجة إيه؟ احنا صاااااااااااايمين قومي ساعدي ماما عاوزين أكل كتير الأم: ما اتحرمش منك ياحبيبي ياللى خايف عليا الابن: لا ياماما مش خايف عليكى خايف ما الاقيش أكل! الأم: بقى كدة! طب انزل بقى جيب لنا حبة طلبات على ما بابا ييجى الابن: لا ياماما انا نازل العب كورة مع صحابى لحد ما المغرب يأذن( جرى ماتلاقهوش اختفى ونزل على الشارع) الابن الصغير: ماما هو انا ينفع اشرب وانا ناسي!! الام: حسبى الله ونعم الوكيل وكالعادة تتدبس الأم المسكينة في كل شيء، وهما ياكلوا بالهنا والشفا. ا