(المواطن الغلبان حسن حصاوى يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه). (المثقف يحاول إقناع حصاوي بأن حمدين مثل السيسي يجب أن يستحق من كل المواطنين التقدير والاحترام حتى لو لم يفز بالرئاسة). حصاوي: والله؟ إنت شايف كده؟ المثقف: طبعا. حصاوي: إنت بتتكلم زى بتوع التليفزيون، اللي بيتظاهروا بالحياد مع إن بعضهم مع السيسي وبعضهم مع حمدين لكن ما بيتكلموش بصراحة عشان ما يخسروش حد منهم ولا من المتفرجين. المثقف: لا دا رأيهم فعلا. حصاوي: مش ناقص غير إنك تقترح السيسي يجيب حمدين نائب له؟ المثقف: وليه لأ؟ دا راجل بيفكرنا بالزعيم جمال عبد الناصر. حصاوي: بس ناس كمان من اللي بيأيدوا السيسي بيقولوا إنه يشبه عبد الناصر؟! المثقف: دول غلطانين. حصاوي: وأنا معاك. المثقف: أهو كده، برافو عليك. حصاوي: أنا معاك إن السيسي ما يشبهش عبد الناصر لأنه مختلف عنه تماما. المثقف: فعلا عبد الناصر أعظم بكتير. حصاوي: والشيء اللي بيضحك إن بتوع حمدين بيقولوا إن السيسي عيبه أنه من العسكر كأن عبد الناصر كان مدني ويمكن كان دكتور، وإذا كانت المقارنة بالرتب يبقى المشير أولى من البكباشي، ويبقى حمدين ما حصلش يبقى بكباشي. المثقف: عبد الناصر كان زعيما وبيحبه الشعب. حصاوي: ومحمد نجيب أول رئيس جمهورية لسنة ونص وعبد الناصر تآمر عليه عشان ياخد مكانه واعتقل كل اللي وقفوا مع نجيب، وفي عهده مسح اسمه من كتب التاريخ لحد ما جه السادات ورجع اسمه. المثقف: عبد الناصر هو اللي عمل نهضة مصر. حصاوي: اللي عمل نهضة مصر محمد علي وهو اللي عمل الجيش المصري وفي عهد عبد الناصر ما كسبش أي حرب مات وساب أربع دول عربية محتلة. المثقف: وبتنسى إنه عمل مصانع؟ حصاوي: وبتنسى إن كان فيه مصانع كتيرة في مصر وهو أممها وبعدها المصانع دي شحتت؟ المثقف: وبتنسى إنه وزع الأراضي على الفلاحين؟ حصاوي: وفي أقل من عشر سنين كل فلاح خد خمس فدادين وسابها لعشر عيال والأرض الزراعية أتفتتت. المثقف: ناصر هو اللي علم كل الناس. حصاوي: علمهم الجهل وخدوا شهادات يبلوها ويشربوا ميتها، فيه بلد لسه بتنهض يعلم كل الناس في الجامعة مجانا وهو عمال في نفس الوقت يدخلنا في حروب؟ سمعت إن أغني الدول بتعلم كل الناس ببلاش؟ وبعد طه حسين ما كان وزير المعارف جاب لنا البكباشي كمال الدين حسين. المثقف: إنت بتتكلم وخلاص ومش عايزني أنا أتكلم؟ حصاوي: من أيام نجيب لأيام مبارك كل اللي حكموا مصر كانوا من الجيش بمن فيهم محمد علي باشا، أشمعنى دلوقت بنتكلم على السيسي لأنه من الجيش مع إنه الوحيد اللي ساب الجيش قبل ما يرشح نفسه، والشعب هو اللي فوضه يعزل مرسي وهو اللي طلب منه ينزل الانتخابات. المثقف: يكفي إن حمدين مع الحريات. حصاوي: وهو السيسي شفته اعتقل حد؟ شفته بيتدخل في القضاء؟ اللي تدخل هو حمدين اللي قبل ما يبقى رئيس جمهورية أعلن إنه هيفرج عن المحبوسين، وإذا كان عندنا معتقلين يبقى بيشكك في القضاء من أولها مع إن الشرطة بتحارب وبيتقتل ظباطها يوميا وهم بيحاربوا الإرهاب لحد النهار دا. لكن هو عايز يفرج عنهم زى ما عمل مرسي، وزى ما الأمريكان والغرب عايزين يفرجوا عنهم. المثقف: إحنا بنتكلم على الأبرياء. حصاوي: حضرتك بقيت قاضي إنت راخر؟ المثقف: إنت شفت تصريحات حمدين؟ حصاوي: كلها أحلام وردية بيبيعها للناس كأنه داخل مزاد، مع إن وضعنا زى الزفت لكن السيسي بيقول الحقيقة للناس وما عملش من البحر طحينة، هي مصر هانت عشان يمسكها واحد بيقول على نفسه إنه صحفي كفء؟ وكل كفاءته إنه كان بينفخ في صدام والقذافي والأسد؟ ويمشي مع مبارك شوية ويقل أدبه شويه، ثم يعرف إيه دا عن شئون الدولة؟ المثقف: لا.. إنت المناقشة معاك غير مجدية. حصاوي: وهو بذمتك عبد الناصر كان بيناقش حد؟ المثقف: طبعا كان بيتناقش مع النخبة اللي حواليه. حصاوي: ما فيش غير عبد الحكيم عامر، وانت عارف آخرة المناقشة كانت إيه؟ (المثقف يغشي عليه). لينين الرملي 599 هرش مخ الأحد 18 مايو 14 1 ارجع يا زمان الناصريون متشنجون، قول للزمان ارجع يا زمان، يعني مش بعيد يدعوا لإعادة الهزائم المتتالية مرة أخرى!. 14 2 يا ترى يا ترى الصحفي الكفء حمدين صباحي لما يسقط في الانتخابات هيمسك رئاسة أنهي صحيفة؟! 15 3 وعد الحر وعد حمدين أن يراجع اتفاقية السلام مع إسرائيل، الظاهر هيتفق مع إخوان حماس على طردهم بعد طرد المصريين من سيناء! 19 4 دعاية صابونية أقسم حمدين (لكل مصري بأنه هيعيش مستريح في عهدي وأقسم بأن إيدي أنضف إيد في مصر) الظاهر كان بيعمل دعاية لصابون جديد!. 22 5 قالوا للحرامي وأقسم أيضا، بأنه لن يسمح أبدا بفساد، ولكنه لم يذكر أنهم (قالوا للحرامي احلف). ولكن القاضي لم يأخذ بكلامه! 19 6 خطب وأناشيد حملة حمدين تذيع بمكبرات الصوت أناشيد وخطب عبد الناصر وأيضا خطب حمدين. يا ترى كان فيها أناشيد انتصرنا.. انتصرنا وخطاب التنحي؟! 21 7 بالطبع إقبال هائل على التصويت في انتخابات الرئاسة من المصريين خارج مصر، طبعا لأن حمدين دعاهم إلى النزول في كل ميادين العالم!.
