حبيبي بابا.. روحت فين يا بابا قوللي اتأخرت عليّه ليه.. مش وعدت تجيب لي أرنب وحصان ابقى العب عليه.. ماما بتعيط يا بابا وانا مش عارفة فيها إيه.. تيتة سرحانة في صورتك.. صورة عليها شريطة سودا لزقوها جنب أورتَك.. حتى جدوا لما اعاكسه الدموع تجري ف عينيه.. فاكرة لما سمعت صوتك آخر مرة الساعة ستة.. قولتلي مبروك يا قطة إنتي خلاص تميتي ستة.. قولتلك طب جَيّ إمتى؟ قولت عِدي لحد ستة بس شرط لما آجي ازغزغك من كل حتة.. تورتتي بتقول يا بابا عايزة شمع لونه بمبي.. قولتلي الشمع جنبي.. قولتلك طيب تعالى.. قولت غمضي تلاقيني.. من ساعتها مجتش عندي.. حتى يا بابا عروستي ساندي قاعدة مستنية تيجي.. كل يوم عيني تغمض واما افَتَح مش بتيجي.. واما اسأل حد عنك يبكي ويقول بكرة يجي.. كله بيعيط يا بابا ومحدش بيقول فيه إيه.. روحت فين يا بابا قوللي واتأخرت عليَّه ليه.. لعبي بتقولك تعالى وابقى احكيلنا الحكاية بس قبلهم أنا.. وآدي إمضا ف النهاية "بنتك القُطة هَنا"...