فرحة عارمة خيَّمت على حشود الجماهير المصرية، التى انتظرت طائرة بعثة المنتخب المصري لكرة اليد للناشئين، التى وصلت فى تمام الواحدة والنصف، من صباح أمس، للتعبير عن فرحتهم، باستقبالهم الحافل لأبطال العالم، الفراعنة الصغار، الذين أدخلوا البهجة على قلوب المصريين. استقبلتهم الجماهير بالهتافات «أهم أهم أهم، أبطال العالم أهم»، فيما رفعت الفتيات لافتات عليها صور لاعبى المنتخب، وحملن الزهور، وأشعل الشبابُ محيط ساحة استقبال الوصول بمطار القاهرة الدولى، بالرقص على الأغانى الوطنية؛ معبرين عن فخرهم وفرحتهم الشديدة، ببطولة كأس العالم، التي حققتها مصر. أحمد هشام: كتبنا التاريخ فى مقدونيا وإحساس الفوز جميل والتقت عدسة «البوابة»، أبطال الفريق القومى للمنتخب؛ وبعثة منتخب مصر المتوجة ببطولة كأس العالم لكرة اليد للناشئين، والقادمة من مقدونيا، بمطار القاهرة الدولى، وأجرت معهم حوارات سريعة، حيث قال المدافع أحمد هشام: «إحساسنا بالفوز رهيب، ومش طبيعى». وأضاف: «عملنا حاجة حلوة، وكتبنا التاريخ فى مقدونيا، وإحساس الفوز جميل، وإن إحنا سجلنا حاجة للتاريخ فى مصر، وبنشكر الجماهير علي تعبهم معانا، ووقوفهم جمبنا، وانتظارنا فى المطار، وعموما إحنا كنّا متوقعين الفوز». عمر الجيار: الحمدلله.. قدرنا نفرح المصريين «إحنا متشرفين جدًا باللى إحنا حققناه، ومبسوطين، والحمدلله أننا قدرنا نفرح المصريين، ولعبنا بطولة بره مصر، وجبناها للبلد، إحنا فخورين بالفوز، الحمدلله حققنا كأس العالم، وإن شاء الله هنركز على بطولة أفريقيا اللى جايه، وبإذن الله نحققها، وكمان ناخد كأس العالم للشباب فى كرة اليد، وإحنا مجهزين من زمان، فى المعسكرات وكل تدريباتنا، وكنّا مركزين، ومحددين هدفنا، ومكناش بنروح بيوتنا، والمدربين كان كل تركيزهم معانا، والحمدلله على الفوز». مازن رضا: ده كأس عالم مش حاجة بسيطة «عندنا إحساس بالفخر، إحساس عظيم جدًا بالإنجاز اللى إحنا عملناه، وبعض المصريين ما كانوش مستوعبين أننا نقدر نعمل حاجة زى كده، بس الحمدلله؛ بالاجتهاد وبركة ربنا، ودى أول مرة منتخب كرة اليد غير أوروبى للناشئين ياخد بطولة كأس العالم، منتخب كرة اليد للشباب أخدها مرة قبل كده، ودي حاجة تتسجل فى التاريخ، وانتظار الجماهير لينا إحساس حلو جدًا، وإحنا فخورين جدا بنفسنا، إن إحنا عملنا بطولة زى دى..». وتابع مازن: «الحماس زاد عندنا أكتر فى ماتش النهائى، لما واجهنا ألمانيا، وإصرارنا على البطولة زاد أكتر، لما شوفنا أهالينا فرحانين بينا، والمصريين وفرحتهم بعد تأهلنا للنهائى، والناس نفسها تفرح، ونفسهم فى الذهب، وكان حلم ناس كتير أوي، ده كاس عالم مش حاجة بسيطة، وبالنسبة لتوقعاتنا بالوصول للذهبية فاحنا بقالنا سنة شغالين على الدهب، وإن شاءالله هنفضل على الذهب، ولحد ما نوصل نكون الفريق رقم واحد». عبدالرحمن حميد: حققنا هدفنا وجبنا الذهب لمصر «إحنا هدفنا من أول ما روحنا أننا ناخد البطولة، وكان عندنا إصرار كبير على الفوز، واحنا فوزنا ببطولة كاس العالم، وعلشان كده كنّا متوقعين حضور الجماهير دى كلها للمطار، واستقبالهم الحافل لينا، وبالنسبة للفوز على ألمانيا، كنا عارفين إنه فريق قوى، لكننا قلنا لنفسنا طالما وصلنا لنهائى كأس العالم فمش مهم بنلاعب مين، لأن احنا بقا عندنا هدف، والحمد لله حققناه، وجبنا الذهب لمصر». ياسر محمد: أخدنا كأس العالم ورفعنا علم مصر "إحنا كنّا جايين فخورين وفرحانين بالبطولة، بس بعدما شفنا مشهد الجماهير بالإعداد دي وفرحتهم، فرحنا أكتر، وهما طول الوقت فى البطولة كانوا دافع لينا، والحمدلله أننا قدرنا نفرحهم، وإن شاء الله نفضل على الأداء ده، وبالنسبة للفوز إحنا كنّا متوقعين ده، لأن إحنا من بداية البطولة عندنا هدف، ومصرين عليه، والحمدلله قدرنا نحققه، وأخدنا كأس العالم، ورفعنا علم مصر».
