طموحها أكبر من عمرها، «مين اللى قال إن الطفل مبيحلمش ونفسه يكون ليه كيان خاص وعنده أحلام نفسه يحققها، كتير مبيهتمش بموهبة الطفل وده أكبر غلط، بالعكس لازم كل الأهالى يشجعوا ولادهم عشان يخرجوا أحلى ما فيهم»، بتلك الكلمات البريئة والتى تفوق كلمات الكبار تحدثت «ندى نبيل» الفتاة البالغة من العمر 15 عامًا عن موهبتها. وتقول: «اكتشفت موهبتى وأنا فى الابتدائي، كنت بقعد أرسم فى الحصص المدرسية، ولقيت تشجيع وقتها من عيلتى وأصحابى والمدرسين، ووالدتى ووالدى كانوا أكبر داعم ليا بصراحة». وتتابع «ندي»: «كنت بمسك القلم وأرسم أى حاجة تيجى فى خيالي، وابتديت اكتشف موهبتى واحدة واحدة، رسمت الجوكر والأزهار وشخصية كرتونية اسمها (جامبل) وفى رسوم خيالية بتيجى فى دماغى وبنفذها، ولما الناس شافوا رسوماتى شجعونى أكتر وأكتر أنى أستمر وأطور من نفسي». وأضافت أنه لا يوجد شخص سليم مائة بالمائة، قائلة: «لما كان بيكون فى عيوب عندى كانت عيلتى وأصحابى بيقولولى عشان أخد بالى وأركز وأقدر أطلع اللوحة بشكل سليم». وأوضحت «ندي» أنها استطاعت أن تطور من ذاتها عن طريق الرسم المستمر، ومشاهدة الفيديوهات على اليوتيوب، متابعة: «برسم مرة وحشة، فى التانية بقدر أطلع الرسمة بشكل حلو، وهكذا وإيدى أخدت على الرسم بشكل كبير وبقيت بحاول أطلع أفضل ما عندي». وعن الأدوات التى تستخدمها فى رسوماتها، قالت إنها تستخدم الفحم والأكورايل والبوستر والخشب والرصاص، لافتة إلى أن اللوحة الواحدة تستغرق منها نحو ثلاث ساعات، وهناك بعض اللوحات التى تستغرق فترة أطول قد تصل إلى أيام. وعن مشاركتها فى المعارض، أوضحت أنها لم تشارك فى أى معارض من قبل، لكنها تستعد بعدة لوحات للمشاركة خلال الفترة المقبلة، متمنية أن تجد التشجيع والدعم دائمًا والعمل على تطوير موهبتها وفتح معرض خاص لأعمالها فى المستقبل.