سوفاج! سوفاجك معاك يا عم، طلبات السيادة؟ ممكن أمصمص شفايفي حبة، يا نتاشة، غالي والطلب رخيص، مصمص، وعصعص، وفلص، هيّ المصمصة بفلوس، شكرًا، مصمصت، وتعبت، وزهقت، ومليت من دي مصمصة، اصطباحة بايخة ودايمة كل طلعة نهار، ده إيه النحس ده، ميتين وجثث وأشلاء وإصابات ومدغدغين.. ويا حفيظ، النهارده بالصلاة ع الزين صحينا على مصيبتين، يا ساتر، واحدة قطر، والتانية بحر وغرق وطلوع روح وبل هدوم، يييييييييه، شيلوا الميتين، عِد يا بني: عشرين راس ودّعوا الهمْ والغم والشوي بنار الأسعار، وزيهم إصابات وواوات وفي انتظار إذن فلسعة، والتقارير الأولية: «هو مفيش غيره السيد إهمال»، تكليفات سريعة من جهات الهلس بإحضار المذكور حيًا أو ميتًا، مستورًا أو عاريًا، ونفخه في ميدان عام، مع التوصية بجنازة ع الضّيق وصرف كام ملطوش تعويض لكل مفلسع، مع التشديد على إصدار بيان استنكاري باذنجاني يشجب كل ماهو حلمنتيشي في أداء حكومة الإهمال.. وسعيكم مشكور.