مبروك لقد اجتزت مذبحة الثانوية بنجاح، حمدلله على السلامة، أنت الآن تحمل لقب طالب جامعى، أنت الان فى مرحلة فرمتة لكل ذكرياتك الحزينة.. طابور الصبح وجدول الحصص وجرس الفسحة والدروس الخصوصية، اليونيفورم، كانتين المدرسة، البلوة اللى اسمها شنطة المدرسة، قرايبك اللى ياما قرصو خدودك وهم بيقولولك شد حيلك وهات مجموع ! - فكك من الناس لأنها كده كده هتتكلم، لو دخلت طب هتقولك هم الدكاترة عمل في عشتو إيه، ولو دخلت طب بيطرى حيقولك بتاع بهايم، ولو دخلت صيدلة حيقولك بياع فى اجزخانة، ولو دخلت تجارة حيقولك كلية الشعب، فخلاص مادام دخلت الكلية اللى بتحبها خليك واثق من نفسك واشترى كيسين قطن حطهم ف ودانك. - إرضى باللى ربنا قسمهولك، واجتهد فى الكلية اللى انت فيها مهما كانت، وافتكر دايما إن طالب تجارة متفوق يطلع محاسب شاطر أحسن مليون مرة من طالب طب بيعيد ويتخرج ينسى الفوط فى بطن العيانين. - ماتحكمش على كليتك من أول يوم ولا أسبوع، خلى معدلك الطبيعى للحكم عليها بعد 3 أسابيع، استشكف كليتك واعرف إيه عيوبها وإيه مزاياها ومناهجها وإذا كنت فعلا عايز تحول من قسم لقسم فيها ولا لكلية غيرها خالص. - طول منتا ماشى فى الجامعة بالذات فى أول شهرين، حتلاقى ناس بتوزع عليك ورق، لا مش افتتاح مطعم ولا سايبر، دى أسر عايزاك تنضم ليها، اتحاد الطلبة عايزك تشارك فى انتخابات، مش عارف مين كده عامل احتفالية إيه، المهم ضرورى يعنى تحتفظ بالورق ده كله عشان تعمله صواريخ وتطيره. - الجامعة مفيهاش أعمال سنة ولجنة تظلم فى الامتحانات، دكتور الجامعة ممكن لو حاطك فى دماغه يفضل يسقطك لحد ماتتجوز وتخلف ومحدش يقدر يعمله حاجة، مفيش سلطة على أستاذ الجامعة غير ربنا، ف خده على أد عقله. - تعريف المعيد: هو شخص غير اجتماعى قعد الأربع سنين يدح لحد ما طلع الأول واتعين معيد، خلى بالك منه أوى واكسبه ومتعاملوش على إنه طالب أكبر منك بكام سنة، قوله يا دكتور، قوله يا دكتور بس وهو حينبسط أوي.. إديله برستيج يا عم على أد متقدر، البرستيج مش بفلوس. - وانت فى الكلية تحاشى تسأل الناس الاكبر منك عن مستوى السنين الجايه عشان حايزهوقك فى عيشتك، تسأل بتاع تانية حيقولك ياه انت بتتدلع ده العذاب كله فى تانية.
