أكد الفنان أحمد السقا أنه يرى أن الفنان طلعت زين يعد من أطيب الشخصيات التي تعامل معها، ونشر تويتة علي صفحته بموقع التواصل الاجتماعي "فيس بوك" قال فيها: "النهارده ذكري رحيل اخويا وحبيبي طلعت زين، طلعت كان اكتر من اخويا ومن اطيب، الناس اللي ممكن تقابلهم في حياتك ربنا يرحمه ويرحم امواتنا جميعا ، دايما فاكرك ياطلعت". ومن جانبه روى الشاعر أمير طعيمة قصة أول أغنية له وكانت من غناء الفنان الراحل طلعت زين، وكتب قائلاً: "أول أغنية عملتها في حياتي كانت سنة 1997 و كانت من غناء الفنان المحترم ده و بعدها سافرت الغردقة أشتغل في بنك لأني بكالوريوس تجارة، كان دايما علي اتصال بيا وانا في الغردقة وكان مصر إني لازم أستقر في القاهرة لأنه شايف اني موهوب وبعدي عن القاهرة مش في صالحي، كان لما بييجي الغردقة بيشوفني وبيصر يقابلني بفنانين و يقدمني ليهم تقديمة محدش بيقدمني بيها دلوقتي، وفي مرة كانت حفلة للكنج منير في الغردقة وخدني معاه و سهرنا مع منير في الفندق اللي كان فيه عشان يحسسني ان الطريق بيبتدي ومش صعب أوصل لأي حد." وأضاف :"كان كل ما يقابل مطرب او اي حد في الوسط يكلمه عني ويخليه يكلمني في التليفون عشان يحسسني اني مطلوب ويديني ثقة في نفسي وفاكر انه خلي محمد محيي و عامر منيب رحمة الله عليه يكلموني ويقولولي انهم عايزين يسمعوا شغلي وغيرهم بس مش فاكر كل الأسماء." وتابع قائلاً: "وبالفعل اقتنعت بسببه اني مش هبقي لوحدي وإنه في ضهري وفي سنة 1999 لما جيت القاهرة عشان أستقر فيها كان ألبومه شبه منتهي وأصر ان الالبوم ما ينزلش الا وانا فيه، مكنتش لسه اعرف حد ومش عارف اعمل الاغنية وخدت وقت وقلتله ما تأنبش ضميري وانزل بقي وتتعوض وحلف ان ده عمره ما هيحصل، عرفني علي اكتر من ملحن وفضل مستني بالفعل لحد ما عملت أغنية ونزل بألبومه. كما روى قصة اخر مكالمة تليفونية بينهما وقال: "في آخر مكالمة بنا قبل وفاته قاللي إن كل خطوة باخدها بيحس ان هو اللي خدها و إنه فخور بيا، وضحك بصعوبة من مرضه وقاللي سمعت كلامي بقي يا بتاع الغردقة وعرفت ان مكانك هنا." وأنهى كلامه قائلاً: "أستاذي طلعت زين أنا بحبك وأنا اللي فخور ان هيفضل دايما في ال CV بتاعي إن أول أغنية كتبتها كانت بصوتك وبدعمك وده شيء يشرفني وبفتخر بيه، ولحد ما أموت هفضل فاكر قد ايه انت حبتني ودعمتني من قلبك بلا أي مصلحة أو مقابل وكنت في وقت من الاوقات مقتنع بيا أكتر ما انا نفسي مقتنع بنفسي، ربنا يرحمك يا حبيبي ويغفرلك ويحاسبك علي قد قلبك الأبيض اللي كان بيحب بس، وحشتني قوي اللهم أدخله فسيح جناتك، إقروا له الفاتحة وادعوا له بالرحمة والمغفرة عشان خاطري." .