لم أكتب سطوري حتى أواكب ما سيقال من نصائح وتحذيرات للفتيات قبل كل عيد من تحرش، كل ما حدث ببساطة أن صديقتى المقربة واجهت إحدى تلك الحوادث جعلتها تكره الحياة وتخاف النزول إلى الشارع، قالت لي بخوف كبير أنها كرهت شارع بعينه وموديل سيارة بعينها وملابسها التي نزلت إلى الشارع بها ذلك اليوم أصبحت تخاف من كل شىء، لن أصف مدى احتشام ملابسها ولا أخلاقها نظرا لإيماني بأن المتحرش ليس بعاقل يميز بين الفتيات فيمس إحداهن بسوء ويترك الأخرى ولن اعتقد أنه يتذكر شكلها أوما قاله أوفعله بل سيكمل يومه بشكل طبيعي وإن تذكر سيضحك ساخرا لأن أمثاله لا يملكون العقل أوالضمير، طلبت من باقي صديقاتى أن يسطرن لها ولكل من تعرضن للتحرش رسائل فقالوا التالي ولم أقم بتعديل كلماتهن فما على الرسول إلا البلاغ المبين: سلمى محمد: " ادعي في صلاتك دعوة المظلوم مفيش بينها وبين ربنا حجاب وثقي جدا أن حقك عند ربنا هيجي في الدنيا والآخرة" رنا محجوب: " متخليش حاجة تأثر عليكى ولا توقفك". أسماء رضا: " انتي بنت ناس ومحترمة هو اللي كلب". ميار محمد: " الموقف دة هيخليكى أقوى على فكرة وتعرفى تتعاملى مع المتحرش بعد كدة وازاى تتصرفى في المواقف، صدقينى الموقف دة هيعلمك حاجات كتير مهمة، وخليكى قوية مع نفسك لانك ببساطة انتى مش غلطانة في حاجة ". أسماء بهجت: "لازم تفهمي انك مش غلطانة في حاجة ومش المفروض انك تكرهي عيشتك خالص انسى اللى حصل أو حتى تناسى وعيشي حياتك عادى لأنه ميستهلش انك تزعلي من نفسك بسبب كائن زى ده، الحياة لازم نتعرض فيها للحلو والوحش ومش لازم نستسلم للوحش علشان نشوف الحلو". ساندي سعد: " كل واحدة فينا اتعرضت للتحرش بطريقة أوبأخرى وممكن تكون مش آخر مرة تتعرضي فيها لحاجة زى دى المهم تكون قوية ومتخفيش تاخدي حقك لأن المتحرش دى بيقرا ضعفك وخوفك في عنيكى خليه هو اللى يخاف منك". جيهان حنفي: " التحرش ده نوع من أنواع الظلم المعنوى اللى البنت بتتعرضله وأى علاج لحاجة معنوية بيبقى صعب أوى لكن ممكن أقولك على حاجة تريحك نسبيا، انتى لازم تكونى قوية ومتماسكة ومتضعفيش وتثقى ثقة تامة إن ربنا هياخدلك حقك وانك ماغلطيش إنما الغلط على المتحرش اللى حسابه أن شاء الله هيبقى دنيا وآخرة، فقولى حسبى الله ونعم الوكيل وادعى ربنا إنه ياخدلك حقك من عنده ويكون هذا الحق عبرة وموعظة له، واحرصى على انك تستفادى من اللى حصل ده في المواقف اللى هتقابلك بعد كدا، وربنا يحفظك ويحفظ كل البنات". هبه شناوي: "بحق حرقة قلبك ربنا هيعوضك سعادة تنسيكي كل اللي شفتيه وكل اللي اقدر اقوله أن ربنا اقرب ليكي من أي حد في الوقت ده ويمكن الشده دي هيا اللي تعرفك على ربنا اكتر وتقربي منه اكتر ياااااارب انت لها ولا حول ولا قوة الا بالله العلي العظيم" اسماء عاشور: " ده نصيبنا وقدرنا اننا نتولد في مجتمع متعفن ومعظم الناس لما تيجي تتكلم عن واقعة تحرش لازم تكون البنت هي السبب بالرغم من أن الدول التانية مش هقول الأوربية وكمان العربية فيها نسبة تحرر عالية وموضة وأزياء والبنت بتلبس اللي هي عايزاه ولبنان أكبر دليل على كده يعني عمرها ماكانت البنت هي السبب بس لأننا مجتمع ذكوري اصلا الراجل عندنا مبيغلطش" ياسمين رشوان: " حسبى الله ونعم الوكيل.. وربنا يبدلك مكان زعلك فرحة تنسيكى كل حاجة وربنا يجبر خاطرك.. واللى يزعلك تانى اديله بالجزمة ومتخافيش بقولك كدا مش عشان تزعلي انك معملتلوش حاجة لاء عشان بعد كدا ميتكررش والواحد مش عارف كان ممكن يتصرف ازاى لو كان مكانها ساعات مش بنعرف نتصرف.ومتزعليش" مروة محمد: خليكي قوية ربنا هياخدلك حقك وربنا ينتقم من اللي عمل كدا وهتعرفي تتصرفي ف أي موقف يحصلك بعد كدا انتي مش غلطانة هم اللي كلاب مسعورة بتشمشم ع أي حد اين كان ايه " هبه محمود: " اقعدي واحكي مع نفسك هاتلاقي نفسك مالكيش ذنب ولما توصلي للقناعه دي قومي صلي وادعي ربنا ينتقملك منه ادعي وانتي واثقه فالاجابه من ربنا وقولي يارب مش مسمحاه واختصميه عنده وثقي أن يوم القيامه هاتلاقيه وهاتخدي حقك بعدها هاترتاحي وانتي مش ضعيفه بعد كدا هتاخدي حقك بأيدك فنفس اللحظه". فاطمة مصطفى: " الإنسان مبيحسش بالسخط والكره على حياته الا لما يكون حقه مسلوب اللى هيخليكي متنسيش لأن المواقف مش بتتنسى المواقف بتعلم انك تاخدى حقك بالطريقة المناسبه لشخصيتك وبطريقة تفكيرك انتى اقعدى مع نفسك فكرى حقك يجى ازاى وهاتيه انتى اكتر واحده عارفه نفسك وعارفه عيلتك وعارفه ظروفك والاهم دماغك هاتى حقك وادعى". ايمان صلاح: "أولا مش انتي اللى تحسي بالكره اللى عمل كده ال يحس بالنقص وهتتردله في اهله ع فكره وساعتها هيكره نفسه اكتر واكتر زعلانه ليه انتى مظلومه مش ظالمه أن شاء الله ربنا هياخدلك حقك عاجلا غير أجلا". أماني حسين: "ولايهمك ياما لسة حتمري بمواقف كتير فالدنيا وحتقدري تعدي كل دا ياقلبي حاسة بيكي، انتي مش لوحدك عاوزة اقلك اني جاتلي فوبيا من وانا في ابتدائي بس الحمدالله راحت بسبب نفس الموضوع بس الحمدالله دلوقتي راحت وتجاوزت كل دا وطبعا انتي قولي الحمدالله انك بتواجهي المشكلة دي وانتي كبيرة عشان نفسيتك حتكون اجمد من طفلة فانتي دلوقتي تقدري تتخطي كل دا بسهولة جدا". إيمان التاي: " عزيزتي دا مش ذنبك.. انتي ماشيه فحالك. اللي يتحاسب هو الشخص المريض اللي تعرضلك وأنا أأكدلك أن المشكلة مش فيكي لأ في هو وفي المجتمع لو شاف غير كدا. متخليش الواقع يغيرك انتي اقوى غيري الواقع. وتحدي السخافه دي. وبلعكس خلي الموقف دا يخلي عندك دافع انك تحاربي.. ع فكرة انا شفت مرة برنامج في بنات تعرضت لموقف أو حالة بس صاروا اقوى وحاربوا ووقفوا بوجه المجتمع وعملوا حاجات كثييرة". رانيا الغزالي: " المشكلة مش فيكى ولا طريقة مشيك ولبسك المشكلة في الكائن إلى ممكن تعتبرية كلب ولمسك". فرح محمد: " من حقك تتوجعي بس مش من حقك سيبي حقك وتسكتي ومتعمليش اللي يخليكي بعد كده قوية وتقدري تحمي نفسك، الكلام كتير بس المهم تكوني من جواكي مقتنعة وبتاخدي رد فعل الأول من نفسك عشان تعرفي تواجهي العالم اللي بره ومتتكسريش.. مفيش بنت متعرضتتش لتحرش بأي شكل الفكرة ما بعد التعرض بقت ايه ؟؟ ضعيفة وواقفة مكانها ولا قوية وقدرت على خوفها وواجهت؟". سمر جمال: "انتى قوية والموقف دا ميضعفكيش يقويك قومى عا رجلك ولو حصلت تانى مرمطى بكرامة أمه الأرض ،الضربة اللي مبتموتش بتقوى واحنا لازم نتعلم منقعش". منى عبده: "حبيبتي انتي اكيد مجروحة ومصدومة من اللي حصلك بس خليكي متاكده أن ربنا فوق الكل قادر يجبر كسرك وقادر أنه ينتقم منه... الموقف ده يعلمك تبقي قوية اوعي تديله الفرصة أنه يكسرك أو يخليكي جبانة استعيني بالله وان شاء الله ربنا معاكي ويقويكي". نور سالم: " أولا انا مش هقولك معلش ومتزعليش والكلام دا انا أول مره اتعرضت للموقف دا مكنتش فاهمه وللاسف لما فهمت أنه كان قاصد اتلجمت ولما روحت قعدت اعيط واتخنقت اوىىىى وقعدت فتره مكتئبه وزعلانه من نفسى اوى انى متصرفتش ودا يرجع لانى مكنتش فاهمه أنه بيستهبل وعشان انا عمرى مكنت سمعت عن الكلام دا وانا كنت شاكه وخايفه اكون ظالماه لأن الإنسان أو سورى الحيوان اللى بيعمل كدا بيبقى حريص وبيحاول ميحسسش حد حتى ممكن يشكك في نفسك أنه مش بيعملى أي حاجه المهم انا اتعلمت درس مهم اوىى انى مسكتش على حقى". حبيبة أحمد: " حبيبتي اعرفي إن ده مش إنسان ده حيوان وناقص تربيه وكلنا بلا استثناء اتعرضنا للتحرش افتكر مره كنت لابسه جلباب وواسع وطويل واتعرضت ليه في حين إن صاحبتي اللي لابسه ضيق ما حصلش ليها حاجه لما حصلي ده أول مره اتخضيت وانهرت وقعدت فتره ما بخرجش بره البيت بعدها قعدت مع نفسي وقلت انا لابسه واسع ومكنتش جذابه ولا قللت من إحترامي وانا ماشيه ليه حصلي كده وقعدت اتكلم مع ربنا يارب انا حصلي كده ليه وليه انا انا يارب كده إنسانه وحشه لحد ما ربنا بعتلي امي وحست بيا وقولتلها حصلي كذا يا ماما قعدت معايا وقالتلي الغلط مش فيكي الغلط في الحيوان اللي نسي إن انتم بتحسوا وهتتعبوا بعد ما تمروا بالموضوع ده بس انتي غلطتي لما ما فضحتهوش وفرجتي عليه الناس ودافعتي عن نفسك". دينا المصري: "متزعليش ومتخليش حاجه تضعفك ولا تهز من كيانك انتي مليكش ذنب غير اننا موجودين ف مجتمع قل فيه الاخلاق". دعاء سعيد: " من حقك تتوجعي لانك بني آدمة دة طبيعي بس انتي مش غلطانة دة للاسف موقف اصبح عادي في مجتمعتنا.. متزعليش لأن التحرش بقى بالنظرة واقتباس الحقوق والتطاول قبل مد الإيد.. انتي اكيد حاجة جميلة والا مكنش حيوان حاول يلوثها.. لأن الوحش محدش بيبصله..انتي جميلة".