1- متشربيش ميه كتير علشان متروحيش الحمام. 2- جاكتات جوزك بتدفى أكتر من بيجاماتك مفيهاش حاجه لما تاخدى هدومه الجواز تعاون. 3- الرجلين أكتر حاجة بتسقع البسى شراب اتنين تلاتة المهم الدفا. 4- مناخيرك ووودانك مهمين في وشك لو سبتيهم كده في الهوا حيقعوا منك البسيلك طرحة ولفى وشك انتى كده كده كنتى بتعملى شعرك كحكة صحتك بالدنيا يا حبيبتى. 5- مش كل شوية هتطبخى اعملى في أكبر حله عندك عدس وحطيه في الفريزر وكل يوم طلعى كيس اشربيه الدفا عفا. 6- بلاش طبيخ الأكل حيعمل مواعين والمواعين لازم تتغسل قضوها ساندويتشات ولو اتهفتى في مخك وطبختى وقفى العيال وابوهم طابور واغرفى في بقهم على طول كفاية تغسلى الحلة مش حتبقى حلل واطباق. 7- السحلب حلو إشربى سحلب. 8- المفرش الدفاية اللى جبتيه لسرير العيال خيطيه من الجنب واعمليه شال العيال بيناموا جنبك من أول ما الدنيا سقعت ولو جوزك قالك ايه المنظر ده قوليله وعد منى أول ما الصيف يجى مش حلبس غير شورتات. 9- الحلبه المعقوده بتدفى صحيح بس ريحتها وحشه خدى بالك انك مش بتستحمى بلاش حلبه 10- العيال كبرت ولازم يعتمدوا على نفسهم خليهم يعملوا فطارهم مش كل شويه حتتطلعى من تحت اللحاف. 11- كل واحد يحافظ على هدومه إنتى مش من الفدائيين الأحرار علشان تنشرى في الجو ده وبعدين محدش قادر يبص لحد مفيش حد حياخد باله من بقعه العدس اللى على بلوفر جوزك إقنعيه وخلى عندك شخصيه. 12- لو لاقدر الله الشر بره وبعيد عن البيت واصحابه اضطريتى تغسلى ابقى استعملى فرن البوتجاز علشان. تنشفى الهدوم مش بس للاكل حطى الهدوم في صينية ودخليها الفرن حتنشف بس كل شوية قلبيها علشان الوش ميحمرش ومش حتسقعى انتى قاعدة جنب الفرن. 13-بلاش الاكل اللى بيعمل انتفاخ حافظى على وضوئك على قد ما تقدرى. 14- متدفعيش فلوس التمارين بتاعه شهر يناير انتى أصلا مش حيجيلك قلب تنزلى ومامتك وحماتك حيزعقولك إاقصرى الشر وخليكى في بيتكم. 15-التليفونات عملوها علشان تتكلمى فيها لا تروحى لحد ولا حد يجيلك الا لو صاحبتك اوى وتتحمل منظرك ده متتنازليش عن مبدأك وتغيرى هدومك علشان حد. 16- بلا رجيم بلا خيبه ابتدى في الصيف باذن الله اللبس الشتوى مش بيبين التخن. 17- دايما اتاكدى أن الريسيفر شغال والنت تمام اومال حتضيعى وقتك في ايه احنا في اجازه. 18-دولاب الخزين في دره فشار وعندك لبن وسحلب احمدى ربنا ومتشيليش هم حاجه أي حاجه تانيه مقدور عليها. 19- مش كل لما الباب يرن تفتحى سيبيه شويه هو حيمشى لوحده العمر مش بعزقه كل شويه نطلع من تحت اللحاف. 20- لو قدرتى تفرشى بطانيه في ارضيه الحمام يبقى كويس مش كل ما تروحى الحمام تتجمدى كده حرااام.
