الجوز الخيل والعربية.. أنغامهم كلها حنية.. سوق ياسطي لحد الصبحية علي راسي يا هانم وعنيا ..الأسطي عاجبني يامحلا غناه ..والدنيا ياروحي ماهيش سيعاه ..فرحان بالخيل اللي مانساه وحياته في الدنيا هنيه.. اوكر ..سائق حنطور منذ 9 سنوات عمره 25 سنة شاب عادي متطور عنده ايميل ولديه حساب علي الفيس بوك قابلته أمام فندق الماريوت يقول قيادة الحنطور بتتورث من الجد للأب للابن ولكني مختلف لأنني أحبتها منذ صغري ، شكل الحنطور بالحصان كان بيشدني دائما فاشتغلت صبيا واتعلمت أسرار المهنة فحبيتها أكتر وبعدين اشتغلت لمدة أربع سنين علي العربية دي ثم اشترتها من سنتين من زميل ليا لأني وقعت في حب زبادي (الحصان)لأنه أبيض وجميل (قالها بحب ) ثمنها كله 9 آلاف جنيه عربية كويسة جلدها طبيعي ومطعمه بالنحاس عربيات الحنطور يجري تصنيعها في أرياف المنصورة، طنطا والمحلة .. مافيش تسعيرة محددة حسب الزبون . لو عيلة مصرية بنراعيهم وبنركبهم اللفة نص ساعة ب30 جنيها لو هم (سياح عرب أو أجانب )بنقولهم 80 جنيها أو الساعة ب150 جنيهاً ! لانهم سياح وجايين عشان يصرفوا ويتفسحوا . مالناش مواعيد ولكن بنفضل آخر النهار في الصيف لأن الشمس مضرة للخيل وبنسهر أحيانا لغاية 7 صباحا ، لكن في الشتاء بنطلع بدري شوية حوالي الساعة 2 ظهرا وبنشطب حوالي 12 مساء. والموسم بتاعنا في الأعياد وبعد ما تنتهي الأمتحانات يعني من نص يونيو لنهاية أخر أغسطس. أنا بحب أطور من نفسي واعمل جو، مرة لبست زي خليجي وعقال وبقيت انادي علي العرب بلغتهم ..واقولهم تبغي حنطور يا خوي لازم يبقي في لمسة جمال أحنا بنشتغل سياحة ومش معني اني بسوق حنطور أني ألبس مبهدل ومقطع بالعكس أنا بهتم بملابسي وبمظهري جدا . بالنسبة لجراج الحنطور ومبيت الحصان ، الناس القديمة في المهنة اللي في شارع البرج (برج القاهرة ) ليهم أسطبلات في بولاق ابو العلا وده يعتبر عنده ثروة لأن الأسطبلات إيجارها قديم و بسيط 20 جنيها في الشهر لكن أنا مأجر مخزن في أمبابة مساحتة 50 مترا لبيات الحصان مرتب ليه مكان وفارش تحته تبن، وأهم حاجة النضافة . و الحصان لو شغلته وأرهقته بشتري له 10 كيلو ذرة و4 فول والفول غذاء مهم زي اللحمة بالنسبة لنا بحوالي 30 جنيها ده غير البرسيم ويعتبر ترفيه لتقوية الحصان والتبن بشتريه بالشهر بيكلف حوالي 220جنيها. في الشهر الحصان بيكلفني حوالي 900جنيه ما بين أيجار مخزن وأكل ورعاية . بالنسبة للصيانة الورش في الأرياف فقط .لو حصل حادثة لاقدر الله بنتصل بحد من الأرياف بييجي ويجيب عدته معاه ويشتغل في العربية يوم يومين وكل حاجة وليها الصنايعي بتاعها حدادة ، سروجي، نحاس . شغلتي علمتني أفهم في الخيل عشان لما أشتري حصان اعرف (أقلبه ) أعاينه أشوفه صغير ولا كبير حالته كويسة ولا لأ يقدر يطلع مطلع كوبري ولا حيبهدلني ويفرج عليا الناس .وكل الخيل اللي الناس بتاكل منها عيش بتكون بلدي مش معني كده أنها سيئة بالعكس ، الحصان يبدأ سعره من 2000جنيه ويصل ثمنه 8000 جنيه وده بيرجع لحالة الحصان وعمره . حمولتي في العادي خمسة أفراد غيري ودي ترجع للحصان لو الواحد قلقان من حصانه بيبقي ماشي وهو خايف .مثلا لو الطريق واقف في مطلع الحصان مستحيل يشد الحمل ويبقي ماسك نفسه أهم حاجة راحة وسلامة الزبون خاصة لو سائح . مشكلة عملنا عدم النظام سايبنها عايمة سواء من شرطة التأمين او السياحة أو المباحث .أنا بقالي في الموقف ده 9 سنوات المفروض خلاص يكونوا عارفني يعني ممكن وأنا واقف كده ييجي ضابط يسألني عن بطاقتي وبالرغم من أن ورقي سليم يضايقني ، وشرطة السياحة أخذت منا صور عشان لو حصل بلاغ يقدروا يتوصلوا للشخص المطلوب بسهولة ومع ذلك في حالة حدوث بلاغ بيأخدونا كلنا !! وأنا بالرغم من أني معايا رخصة لكن وأنا مروح لازم ماعديش من شارع جامعة الدول بستخبي من ورا سفنكس ولو عربية الحي شافتني بتسحب مني العربية طب استخبي ليه هو أنا ببيع ممنوعات؟؟؟ طالبونا برخص وبالفعل استخرجناها ونظمنا نفسنا في مواقف ثابتة لانغيرها ( كل موقف بيكون فيه 3 أو4 عربات حسب اتساع الموقف) . ومع ذلك في أطفال عمرهم 12 سنة بتسوق حنطور و بيجروا بيه .وأنا متأكد أنه ما يعرفش يتصرف لو حصله مشكلة ومعاه سياح .أقل مشكلة حتحصل حنتأذي كلنا .ياريت يمنعوا الأطفال من «سواقة الحناطير»!
