توقّع الاعلامي عمرو أديب حدوث 4 سيناريوهات يوم 25 يناير المقبل، في الذكرى الثانية لاندلاع الثورة. وقال أديب، في برنامجه "القاهرة اليوم" على "أوربت"، "السيناريو الأول إنه يحصل زي يوم 25 يناير اللي فات، مسيرات محددة تنطلق وتتحدث عن عدم أخونة الدولة والمطالبة بإسقاط المرشد ودي حاجة تضحك، يسقط إزاي المرشد مش عارف؟ وده السيناريو الأكثر احتمالا". وأضاف "الاحتمال الثاني نزول الناس بشكل قوي وناس تانية قدامهم ويحصل ضرب ويموت 20 أو 30 ويبدأ الناس تسأل مين موتهم والقصاص ليهم، والسيناريو الثالث هو نزول الناس ويستمروا ما بعد يوم 25 لحد جمعة أخرى". وتابع أديب "السيناريو الرابع، يبدأ نوع من أنواع الصدام ويكون هو الأول والاخير، وطرف يخلص على التاني، وقنديل أول مرة يقول الحكومة ستضرب بيد من حديد لأي حد يطلع عن الشرعية، وهذا التصريح لم يستخدم من أول الثورة، وتبدأ المواجهة الأخيرة بين طرفين وطرف يخلص على التاني أنا شايف إن ده وارد". وواصل أديب "كل الحكاية مش عاوزين دم كتير، وأن يمضي اليوم كما مضى 25 يناير اللي فات". وحول الحرائق المتكررة في مصر هذه الأيام، قال أديب "مجموعة الحرائق اللي بتحصل تمهيد لحريق كبير، ومحدش عارف مين اللي عمل الحجات دي خالص، احنا في وطن الطرفين فيه لا يصدقوك القول، ومحدش يعرف يهزم الناس، وده الدرس اللي اتعلمته من 25 يناير".
