أنا كان لى صحبة أحباب بتشوفنى من خُرم الباب ولا مرّة فهِمت الموضوع ولا عمرى عرِفت الأسباب ولا عمرى بادلت الأسلوب ولا حدّ شرَحلى المطلوب إزاى الأحجار دى قلوب وازاى التجريح دا عتاب...؟ الرحمة سطرين فى كتاب والحكمة ف قعر الصندوق هات إيدَك واتفضَّل دُوق مَزمِزها على طرْف لسان واستطعَم نفْسَك بهدوء الفرصُة عرايس..عرسان والوِحدة داء الإنسان والنجم العالى المشنوق. يا مسافر على ضهر النُّوق.. أنا زيّك برحَل وبَعُود بأغانى العُمر الموعود وبْدُنيا مليانة كلام بدايتها.. زى الأحلام نهايتها.. زى الأفلام تتطمّن على كل وجود وتطبطَب على كل آلام يا سلام يا حبيبى يا سلام! لو قلبَك يفهم ويلِين لو روحَك تصحى وما تْنام! لو نبقى فى الرّيح بلالين! سابْحين بنقرّب م الضوء على كفّ الشوق.. متقابلين من فوق.. تغوينا التفاصيل وانا عارفَك مُخلِص وأصيل وبتصبُر ع الحلم سنين صبر العاقلين المجانين فى الكتمَة.. بيشقّوا سبيل فى العتمَة بيستنّوا شروق أنا بحلَم واسكَر وأفُوق ملاقيش حواليّا مخلوق والاقيك متبعتَر فى الكون متبدّد فى ظِلال اللون ومحيّر نور الألباب الضلمَة مخبيّة الباب وانا وحدى من غير أحباب أنا وحدى.. ماكسبتش شىء، غير إنى فهمت الموضوع غير إنى عرِفت الأسباب.
