من جديد أثارت الفنانة ياسمين صبرى، حالة من الجدل الواسع مع والدها الدكتور أشرف صبرى، والذى فتح النار عليها بعد عدد من التصريحات المثيرة. وشاركت ياسمين صبري، فى دردشة عبر تويتر من خلال Space، أطلقها الكاتب تامر عبده أمين، ونستعرض من خلال السطور التالية أبرز تصريحات ياسمين صبرى. قالت ياسمين صبرى : الكون ده عبارة عن "مينيو، قائمة"، وأنت اللي بتختار لنفسك ومحدش بيفرض عليك حاجة، فكر بنفسك واحسبها ثم توكل على الله واختار، أنت لما بتحب حاجة الكون كله بيتسخر لك، وكل حاجة بتحبك لما أنت تبدأ تحب نفسك الأول. وأضافت ياسمين صبرى: لما تطلب من ربنا الكبير اطلب كتير، احنا نستاهل نكون في مكان أفضل، ونستحق كل حاجة حلوة في الدنيا، طبعًا لازم نسعى ونحلم، لأن اللي مبيحلمش دا شخص ميت. وأوضحت ياسمين صبرى: كنت طفلة لا أملك كل ما أحلم به، كنت بتمنى أملك ملابس وأحذية جميلة، وقتها تخيلت ودربت عقلي الباطن على التخيل ده دون أن أدري، وعندما كبرت الأمر تطور معي وأصبحت بدرب نفسي على تخيل أحلامي وطموحاتي الأكبر. وأضافت ياسمين صبرى: كنت أنتمى لطبقة متوسطة، وقد درست فى فترة من حياتى فى إحدى المدارس الحكومية، وكنت أذهب إلى تمرين السباحة مشياً على الأقدام، وحينها كنت أتخيل أننى أملك أجمل الأشياء فى الدنيا، سواء من ملابس أو شقة فاخرة أو سيارة. وتحدثت ياسمين صبرى: كل مرحلة هتوصل لها هيكبر حلمك معاك، أحببت نفسي جدًا، ولهذا مختلطش بأشخاص ملهمش لازمة، كنت بشوف أني أستحق الأفضل، وأقول كيف أسعى للأفضل وأنا بورط نفسي في أشياء بتهين نفسي وتقلل من شأنها. وتسببت تصريحات ياسمين صبرى، فى إثارة غضب والدها الدكتور أشرف صبرى، وكتب عبر صفحته الشخصية "فيسبوك" قائلاً: "دي المدرسة اللي اتخرج منها بناتي اللي واحدة منهم بتدعي إنها كانت في مدارس عربي، وعاشت حياة بائسة فقيرة، وإنها وصلت بمجهودها! هو الكذب في حد يوصل للدرجة دي؟ أنا أفهم الكذب لما تبقي غلبانة وتكذبي". بسبب زفاف شقيقها.. هجوم حاد من والد ياسمين صبري عليها وأضاف والد ياسمين صبرى: " قولي أنا من عيلة كبيرة ومدارس أجنبية وعشت في سرايا وبابي كان وزير وهو بيشتغل عامل! يبقي كذب له مبرر! لكن إن واحدة اتولدت لها شغالة فلبينية بتلبس من باريس لأني كنت باجيب لها لبسها من هناك ودخلت مدرسة ال EGC أرقي مدارس إسكندرية في وقتها". واستكمل والد ياسمين صبرى: "وعاشت في فيلا بحمام سباحة وصالة جيم، ولها غرفة خاصة بحمامها وكانت بليدة وطلعت روحي، ويا دوب تنجح بالعافية بخمسين في المية، وكانت بتروح الكلية بالعافية واصحيها الصبح بالساعة عشان تروح الكلية". وتابع والد ياسمين صبرى: شهاداتها عندي كلها كحك وأبوها دكتور.. تطلع تدعي إنها عاشت حياة بائسة وغلبانة وبتكمل باقي الشهر من غير فلوس! ايه الكدب والفيلم المتخلف ده انتي عايشة دور تمثيل ورثاه من جد والدتك سيد سليمان. وبتكدبي ليه؟.. حتاخدي نشان يعني علي خيبتك وفقرك وصلتي وبقيتي حاجة؟ انتي بالنسبة لابوكي حتة عيلة مش فاهمة بتعملي ايه غير انك بتشوهي اللي رباكي عشان الناس تسأفلك.. حتي اخوكي بهدلتيه اللي طول عمره جنبك وبيجي من آخر الدنيا عشانك! ياشيخة بطلي اللي انتي فيه ده وحسبي الله ونعم الوكيل فيكي. بطلي تجيبي سيرة عيلتك أبوكي اللي رباكي منك لله. ولم يكن هذا الصدام الأول بين ياسمين صبرى، ووالدها الدكتور أشرف صبرى، حيث حدث من قبل عندما حسمت ياسمين صبري الجدل الذي دار حول غيابها عن زفاف شقيقها، وفق ما أعلنه والدها وتسبب في تصدر أخبار عائلتها مواقع التواصل الاجتماعي.
