ردت فاطمة السقا شقيقة الفنان أحمد السقا على ما قالته الفنانة مها أحمد والتي هاجمت فيه نجمين من زملائها في الوسط الفني دون ذكر أسماءهما. وقامت فاطمة بالإشارة لمها أحمد عبر صفحتها ب"فيسبوك": "الكلام ده موجه ليكي يا أستاذة، بدل ما تفضلي تمسحي ردي كل شوية أبهرتيني يا مها بأخلاقك العالية، وبأنك افتكرتى العيش والملح اللى كلتيه فى البيت بتاع الفنان اللي مش عارفة تقولى اسمه بس عرفتى تقولى عليه (ندل) اللي هو أحمد السقا". وأضافت: "بس أنا بقولك قدام الناس، قطع لسان أى حد يقول عليه كده لأنه راجل أكرمك ووقف جنبك أنت ومجدى بدل المرة ألف.. وأمير كرارة برضو راجل جدع ومحترم للى ما يعرفهوش فى البوست بتاعك ده.. معرفش إيه الفرص اللى كانت عندك اللى كان يتمنى يشتغل معاكى فيها زمان، بس هو أى حد يتمنى يشتغل معاه دلوقتى أكيد.. وكلمة الدور بينادي صاحبه دى بتاعة أفلام.. ما بتتقالش في الحقيقة كفايا دراما وتشويه للناس". وتابعت: "وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج، الحقيقة أنا مش عارفة أنت عايزة إيه.. أنا مش شايفة بعد العشرة الطويلة اللى أنت قولتى عليها غير كمية الحقد والسواد والشماتة اللى كانوا متداريين ورا ابتسامة كدابة، معرفش أنت إزاى كنتى بتدخلى بيوتنا الصراحة وأنت ست وحشة كده.. نسيت أقولك السب والتطاول ده بيدل على الأصل.. وإحنا بقى ولاد ناس، مع أننا عندنا كلام كتير أوى يتقال". وكانت مها أحمد، قد فتحت النار على زملاء لها في الوسط الفني لكنها لم تذكر أسمائهم. وكتبت مها أحمد عبر صفحتها ب"فيسبوك": "عوضي على الله دى الجملة اللى دايما بقولها لما اتصدم في أشخاص.. الحكاية ياسادة نجمين عملوا مسلسل واتنجمت عليهم بنوتة لسه ألف باء تمثيل واديتهم على قفاهم وركبت عليهم إلى أن أصبحت بطلة المسلسل وبطلة الدعاية للمسلسل وهما راضيين رغم أن طول عمرهم مبيعملوش كده مع أى زميلة لهم أقربها أنا". وأضافت: "النجم الأولاني بيني وبينه عيش وملح وزمالى رشحت فمسلسل بطولته وكان بيقنعني بدور ولما وافقت بعتولي دور تاني معرفوش دور متعملوش واحدة مبتدئة المفروض إنه عارف قيمتي الفنية وعارف أني إضافة له.. اتهرب منى وموقفش جنبي وباعني رغم أن الكل عارف اني زي اخته (ندل)". وتابعت: "أما التاني كان فبداياته يتمنى يسلم عليا ويقولي يا أستاذه نزلت من نفسى وقلتله مش هنشتغل مع بعض ماهي الحوجة مرة.. رد وقالي الدور بينادي صاحبه.. طبعا محكلكوش قد أيه ندمت نفسي وعشت أسود أيام حياتي عياط واكتئاب، وقلت عوضي عليك يارب.. تمر الأيام والاتنين يعلو ويتجمعوا مع بعض فمسلسل واحد -على عينهم طبعا- ويمثلوا وحش قوي تمثيل الكفار وطلعوا كمان مبيقروش اللي بيمثلوه وربنا يركب عليهم بنوته سنة أولى تمثيل وخبرة ويتحول المسلسل والدعاية الدراما كاملة لصالحها وهما مخدماتية للاستاذة.. يمهل ولا يهمل". واختتمت مها أحمد: "ابدوا من جديد يا أوفر تمثيل ياللي مبتقروش ياكمبارس جنب النجمة.. نصيحة بلاش تتشطروا على اللي كان بينكم وبينهم عيش وملح بلاش تتشطروا على اساتذتكوا عوضنا على الله يارب متحوجنا لحد حتى ولو كان اقرب الناس لينا".
