23/11/2011 12:31:09 م شيماء قنديل رغم سخونة الاحداث المتلاحقة بميدان التحرير الا ان المصريين لم ينسوا روح الفكاهة ، فقام جروب " خفة دم المصريين" باطلاق بعض النكات عن الاحداث الجارية ..حاولت بوابة اخبار اليوم سردها : " ابشع ما في الديموقراطية انها تجبرك علي سماع صوت الحمقي" .. "سألوا العيسوي : رجالة الداخلية بيضربوا الثوار ليه ؟؟؟قال: كدب طبعا ... الداخلية مفيهاش رجالة أصلا".. "من طرائف الشعب المصري يقال .. احنا الشعب الوحيد اللي مش خايف من المدرعات ،لكن خايف يقول لاهله انه نازل الميدان".. " يا مصر فيكي كل حاجة وعكسها .. نتصور جنب الدبابة ومرة تحتها".."اعزائي المشاهدين نبدأ علي بركة الله الشوط الثاني بعد استراحة دامت تسعة اشهر ..لو قاعد في الميدان هتلاقي الشرطة علي يمينك والشعب علي شمالك ..نفكركم بطقم الحكام :مدرعة حكم الساخة ودبابتين حكام راية..واحد يقولي مبارك خرج من الشوط الاول ونزل مكانه المشير ..اقوله فعلا يا مسهل شكله شوط تاني نار..والشعب فهم الدرس في الشوط الاول ونزل سخن والشرطة خدت حذرها وزودت نفسها بامكانيات جديدة ..كل الامنيات الطيبة للشعب ..وكل المؤشراتتؤدي لفوز الشعب حامل اللقب ..كل شئ وااارد" " الي المصريين في الخارج:- شككلكوا هتصوتوا فعلا ..بس علي المصريين في الداخل!!" " انباء مؤكدة عن وفاة الرئيس السابق جسني مبارك متأثرا بنوبة ضحك متواصلة وهستيرية..وكانت اخر كلماته هي "كفاءة يا صاحبي انا او الفوضي".."وطلع عندنا جيش... بيضرب في شعبه".. ولم يكتف الجروب باطلاق النكت الساخرة ،بل انه قدم دليل للحماية من القنابل المسيلة للدموع :" للوقاية من القنابل المسيلة للدموع المستخدمة من قبل الشرطة هذه الايام : تخلص من جميع ملابسك في كيس بلاستيك وتخلص منها..اشرب لبن او زبادو..تناول اقراص فيتامين سي..تناول اقراص فحم كل 8 ساعات لامتصاص الغاز من معدتك ..اشرب عصير جوافة لزيادة نسبة الصوديوم المستنزف من جسمك ..لو الانف ينزف مخاط اسود..لابد من الذهاب الي المستشفي لان الرئة قد تكون مصابة ومن الممكن ان تصاب بجلطات.. اخلط ابيكو جل بضعفه ماء واغسل عينيك ووجهك ..خذ 2 كمامة وضع بينهما قطن فيه فحم لامتصاص الغاز ..ارتدي نظارة كبيرة لحماية عينيك وابتعد عن ارتداء عدسات لاصقة ..اغسل يديك ووجهك بالابيكو جيل المخلوط بالماء.. خذ "هايدرو سايف" لانه يخفف الم العضلات وبيظبط كيميا الجسم التي تاثرت بالغاز..ولا تؤجل هذه الخطوات للغد..لابد ان تبدأ ذلك الان " اما جروب " نكت الثورات العربية" : "واحد قاعد هو وصاحبته ..قالتلو يا امان قولي كلمة تحسسني بالامان؟!..قالها الجيش الوطني...".." الثورة اللي فاتت كانت كنتاكي اما الان فهي سمنة بلدي وتحدي"..." يا عسكري واقف بالفرس عي جتتي ..لا انت البطل ولا انت الفتوة حتي ..يوم ما تقول هاخد البلد ..هقولك خدها بس علي جثتي..صلاح جاهين".."يعني اية دولة مؤسسات : يعني الداخلية تضربك،تيجي اسعاف وزارة الصحة تشيلك،وتسلمك للجيش وبعدين يوديك محكمة عسكرية تسجنك ..ويبعت للاعلام يقول عليك بلطجي..وهو ده العادي من دولة المؤسسات".. وغيرها من النكات التي استنبطها المصريون لمحاولة التعبير عن قضاياهم باسلوب ساخر.
