صدق.. أو »عنك ما صدقت« لما اقول لك »ان غالبية الفيلات والشاليهات اللي أخدها كبار المسئولين في بلد »المليون طابور « علشان رغيف عيش بشلن.. كانت »بالتقسيط« المريح.. وبسعر »أقل« بكثير من عشة الفراخ اللي عملتها الحاجة الوالدة فوق السطوح »أيوه خدوها كده«.. وعلشان افقع مرارتك، واحسرك علي عيشتك واحسسك انك كنت عايش في البلد »قفة« دول مش بس خدوا »فيلالهم« ببلاش.. لأ.. دول »خدوا« عليها.. أو فوقها.. »شقلة فلوس« تقعد انت وعيالك والجيران علي باب بيتكم »تعدوا« فيها شهرين ماتخلصوش عد.. ماتستعجلش.. وتنط السطور.. ح افهمك.. كان عندنا »وزير« إسكان.. راجل صاحب صاحبه وخدوم.. عارف ان »زمايله« الوزراء والمسئولين »غلابة« علي باب الله، فلما كان يخلص مشروع فيلل في »مارينا الشروق التجمع هايتن مايتس«.. يميل علي المسئول من دول، ويقول له ماتاخد لك »فللتين« في المشروع الفلاني، حاجة محترمة مبنية علي 5 آلاف متر بس!!.. المسئول يعمل فيها »شحات« وغلبان.. منين ياخويا.. ماانت عارف »البير وغطاه«.. كله علي إيدك.. ده المرتب علي البدلات علي العلاوات علي السفريات علي الاجتماعات علي مجالس الإدارات علي »الظرف« المتلغم اللي بناخده كل شهر من الرياسة مايكملش »الشهر«.. فيبص له وزير الإسكان »بصة« مع ابتسامة ويطبطب علي راجله »ياراجل« ده كلام.. احنا »بتوع« بعضنا.. اللي خلي علي بابا »المقيح« بعد الضني لابس حرير في حرير مش حيخليني »اخدمك«.. أنا خلاص »خصصت« لك 4 فيلل.. واحدة باسمك والباقي للمدام والأولاد، وعلي الورق عليك تسدد 20٪ من »التمن«.. يا عم منين.. باقولك علي الورق.. انت لا حتسدد ولا »حتتنيل في سنتك«.. ده كلام مكتوب علي الورق.. انت بعد أسبوع.. مش حتبيع ال3 فيلل.. كاش، وعندي كمان المشتري.. كده يا عم كسبت كام.. مش أقل من 10 أرانب.. لما تقبض »سدد« ال20٪ بالرسمي، والباقي بالقسط علي 5 أو 6 سنين.. تقف عليك الفيللا »بشلن«.. انت اخويا يا سمسم.. حبيبي يا علي بابا!!.. أوعي تفتكر الحكاية وقفت علي كده.. لا »اسمع«.. اللي جاي »أنيل«.. ساعات كان واحد من »القُرنية« حرامية الأراضي وجمعيات الإسكان.. يروح للمسئول نفسه.. »اللي عليه العين«.. ويقول له أنا »بعد إذنك« اشتريت لسعادتك حتة أرض.. علشان نستثمرها.. والمطلوب سيادتك مالكش دعوة بيها بأيها حاجة.. لما نبيعها نتحاسب.. كفاية علي سيادتك مشغوليتك بخدمة الوطن.. كان الله في العون.. بعد شهرين.. يلاقي القُرني بتاع الأراضي داخل عليه ومعاه »قفص« فيه »أرنبين«.. وشك حلو يا فندم.. ده مكسب الأرض.. شكراً يا »قُرني«!!.. اللي بعده.. مستثمر حرامي.. يروح للمسئول نفسه.. سيادتك.. أنا اشتريت للأولاد.. محبة والله يافندم محبة.. كام سهم من مصنع »الميه« المعدنية الجوفية اللي أنا عملته.. وأهي نوايا تسند الزير يا معالي الوزير.. و السهم ب05 قرش.. بعد شهرين.. مبروك عليك يا فندم »الأسهم« ضربت.. وده مكسب سعادتك »أرنبين« ولو عاوز تبيع الأسهم حتاخد 3 أرانب، وديك.. يقوم المسئول »يطبطب« عليه ويقول له.. طب من غير تكليف »حط« الأرنبين دول جنب اخواتهم في »التقفيصة«!! عندي سؤال »هي الأرانب بتخلف« كل أديه.. يا فندم.. اللي سيادتك تأمر بيه.. ممكن »يخلفوا« كل يوم.. ها.. ها.. ها.. هذه كلها قصص حقيقية.. وأصحابها أحياء يرزقون.. وفي »التقفيصة« برضه!
