يا أخي أنا ماشفتش ولا ح اشوف.. أخيب مننا.. حتي لما نحب »نقلد« مابنعرفش.. وبنقلب التراجيدي.. كوميدي.. أيوه با اكلمك.. علي الموضة اللي شغاله اليومين دول.. كل واحد »شايل« لي چيركن ولا قزازة.. وحاطط فيها ربع لتر بنزين.. وعمال يلف.. بيها في الشوارع.. لغاية مايلاقي.. مبني عليه العين.. مجلس شعب.. مجلس وزراء.. يروح »مدلدق« النقطتين علي نفسه وهوه متأكد ان فيه ناس »حتجري« تطفيه.. ماهو لو »دكر« بصحيح.. وفعلا زهق من عيشته.. مايروح »يولع« في نفسه في الصحراء.. مش لازم تبقي ولعته متصوره ومتذاعه واللي ما يشتري يتفرج.. وياريت بقي.. ماينساش ياخد معاه چيركن »مليان«.. وبعدين مع احترامي لكل المحاريق معلش يعني.. ماهو لو كان »الحرق« بيصلح الدنيا، وبيحقق لكل واحد فينا اللي نفسه فيه ماكنش حد غلب.. وكان الأولي بقي.. ان نوابنا.. يولعوا في نفسهم، لان الحكومة، عمرها.. ما نفذت لهم طلب واحد.. من اللي بيطالبوا بيه.. طيب ح اقول لك.. من أسبوع.. النواب مسكوا »وزير الصحة« وسمعوه من المنقي »خيار« بسبب »سياسته« اللي حاططها للعلاج.. »تقول واحدة من سياسات الوزير العبقرية.. انه لو جالك ياغلبان فجأة ذبحة صدرية مالكش علاج إلا لما تجيب موافقة من لجنة طبية.. يعني موت ونوعدك وقبل الدفنة سيكون معاك قرار العلاج«.. وقعد النواب »يرصوا« للوزير.. المشاكل والبلاوي اللي بيشفوها في كل مستشفي وازاي الناس مابقتش عارفة ولا قادرة تتعالج.. الوزير ياخويا.. خد »الكلمتين« من هنا..، ولا كأنه سمع »حاجة«، ولا شكوي واحدة.. حلها.. ده بالعكس.. ده أكد.. انه حيستمر في سياسته.. وكأنه بيقول للنواب مطرح ما تحطوا راسكم حطوا رجليكم.. ولا حد من النواب زعل ولا حد فيهم اتأثر.. ولا حد قال والنبي لاولع في نفسي.. والدنيا »بيس« وكله بيسترزق.