بعد تظبيطة الحكومة » العجب« وتشكيلة مساعدي ومستشاري الرئيس »العجاب« وتعيين المحافظين »الاعاجب « وتغييرات الصحف.. ومجلس حقوق الإنسان العجيبة .. »جاب معانا الإخوان من الآخر«.. وبقي لعبهم علي المكشوف و»علي عينك يا تاجر«.. ومابقاش »يهمهم« يتقال دول بيأخونوا الدولة »آه بنأخونها.. وبنخنخنها كمان«.. ولاإنهم بيركبوا رجلتهم في كل المواقع والمناصب القيادية.. »براحتنا«.. ولا انهم بيصفوا حساباتهم مع كل من قال كلمة حق وانتقدهم.. »ابقي خلي طولة لسانهم تنفعهم«.. معدش فارق معاهم.. مين يقول ومين يعيد.. وواضح كده انهم ماشيين معانا بمبدأ »اللي يختشي من بنت عمه ده إحنا مايجبش منها عيال«.. واللي في دماغهم حينفذوه..و سكتهم حيمشوا فيها زي ما هما راسمين.. وحيستمروا ومفيش حاجة »حتوقفهم«.. واللي منكم لسه عنده أمل انه يحصل عكس كده.. أو عنده »عشم« زي إبليس ان الناس دي تحط في عينها »حصوة« ملح، وتراعي ضميرها.. وتسيب حاجة أو وظيفة عليها العين من غير ما تاخدها أو تشقطها.. يبقي »أهبل« »ونخنوخ«.. ومايعرفش الإخوان كويس ويستاهل يتقال له »أمك في العش ولا طارت«.. هو انت فاكر ان الناس دي لما »جت« لها الفرصة.. وبقي في ايديها انها تمسك كل مفاتيح البلد وتهيمن وتكوش.. كان ممكن تسيب الحكاية دي لغيرها، .. ولا مخك مهيألك ان الناس دي شاغلة مخها قوي بمستقبلك وحتقعد تفكر مين من غير الإخوان الأصلح والأكفأ للمنصب الفلاني أو الموقع العلاني.. علشان البلد تقف علي رجلها.. يابا فوق.. البلد كلها مش فارقة معاهم.. دي عالم جعانة سلطة من أربعين سنة .. وفجأة وقعت في حجرهم »الفرخة« كلها.. بأنهي منطق بقي يا فالح.. يا أذكي اخواتك يسيبوا لسعادتك »الصدر والوراك«.. ويكتفوا هما بجناح ولا »زلمكة« ..، وعلشان كده.. ماتتعبش نفسك من هنا ورايح، وما تقعدش تقول كل ما يعينوا حد في مكان »ده ما ينفعش«، »ده مش كفاءة« .. اصله اخوان .. او قريب اخوان ..ولا فيه داعي انك »تعمل« زي الوَلايا وتقول »ده ما يرضيش ربنا« الدين ما بيقولش كده.. الكلام ده ممكن »تشحت« بيه وانت لابس مقطّع علي باب السيدة.. أو لما تكون مش لاقي تصرف علاج وانت أُدام مدير المستشفي.. أو لو حد زنقك في مواصلة عامة.. لكن مع الإخوان ما ينفعش ومحدش حيسأل في أهلك.. مش أنت اللي انتخبتهم.. »ألبس«.. وعلشان كده.. نصيحتي ليك.. يا إما »تخليك« لارچ وتحترم نفسك وتكمل فرجة.. أو »تعترض« بس ساعتها الإخوان حيقولوا لك.. يا سلام دلوقتي جاي »تتكلم« وصوتك »طلع« ما انت النظام السابق كان ملبسك »الخابور« وفضلت ساكت.. اشمعني دلوقتي.. في الحالة دي »مقدمكش« غير انك تتحجج لهم بأنك جالك »بواسير« ومش »حمل« خازوق جديد.