انسان ف بحر الزمن عاشق كما الدراويش ابوس ايدين الوطن ولغيره ما باغنيش لو أملي بين النجوم اليأس ما يطولنيش أصبر لحد الزمن ما يقوللي: يا إنسان عايز تعيش الحياة تعالي مصر.. وعيش
أنا ومصر اصحاب وتالتنا كان الزمن هنا عرف ذاته وحس بساعاته من قبل ما الأرض تعرف يعني إيه اوطان من قبل حتي الدفا ما يلاعب الاحضان كان الزمن حيران ماشي ف كون بردان غرقان مالوش ايدين ف محيط بلا شطآن المصري مد ايديه من غرقته ينشله احنا اللي هانشكله
سنة وثانية ويوم اسبوع.. دقيقة.. شهر أحنا اللي رح نظبطه علي ساقية جوه النهر كان الزمن ماشي ولاحد حاسس بيه ولا هو داري بحد لحد ما جه هنا وبقي سنين تتعد موسم حصاد ممتد موجة حضارة عفية بتعلا فوق المد من يومها ظهر الشيطان حاقد.. حسود.. طمعان ف كل مره بإسم وف كل مرة بشكل هكسوسي مرة.. ومرة صهيوني ومرة صاحب غشاوة سارحة علي عيوني
يا مصر لازم دراعك.. يعدل الموازين يامصر لازم شعاعك.. يبقي له حصن حصين جيش انتصار الكرامة.. علي حدودنا أمين من حرب قادش سهامه.. تنصرنا يوم حطين من عهد مينا وأحمس وعرابي جد جمال من حور محب العظيم ولآخر السلسال
- سكت الشيطان؟! - ما سكتش جه بالظلام اشكال الاحتلال المُر.. والغل والأهوال في خمسة يونيه الغدر اصعب من الزلزال بكت يوميها الجبال.. وبكي الشهيد ف القبر والتار وقف ع القنال.. لابس قناع الصبر
المصري أول حبيب للدنيا.. يعشقها المصري أول حروف الدنيا تنطقها أول صديق للزمن الخضرة تتمدله والصبر.. حكمة تجيب الحلم من أوله وبالدموع والفرح اسم الوطن.. تغزله القهر.. هانبدّله الظلم لو ينتشر بالعدل.. هانعدله لو العدو كان جبل احنا اللي ح نزلزله لو العدو اعصار بايدينا ح نسلسله لو كان عدوي شبح دم الشهيد.. يقتله..
قصص البطولة يا شعب اللي ابتدت بينا لو حتي يوم اختفت رح تتولد فينا دخلت خلايا القلب وسكنت الوجدان ولسه نورها بيسعي في دروب سينا الصبر مش تفريط ولا استسلام ولانص نومة ذليلة علي فرشة الايام ولا ليل هزيل منطفي بيجرجر الاعوام الصبر.. غَزْل وجد قادر ينتصر ع الهزل بين الجموع ولا وحيد.. ف العزل تقدر تكون - بالصبر- أغلي تاريخ تقدر تكون بنّا بيبني حائط الصواريخ تقدر تكون - بالصبر - يا ابن البلد يا خفيف اتقل من النووي علي جدار بارليف
اتنين وخمسة قابلني يا ستة أكتوبر اتنين وخمسة ف عز الضهر يا رمضان مافيش قصادك يا مصر عدو لا يقهر ولا فيش لجيشك موانع لما يكون غضبان الصاعقة عارفة الطريق ومدر عاتي طوفان ف الجو نسر الزمن بيعظم الطيران ف البحر.. وحش البحار طوربيد.. سعيد بالموت اضرب بأمر القيادة وبأمر م القرآن
فرحك يا سينا النهاردة مدي الإيدين تنباس قومي وحسي بعشقي من شهقة الانفاس حجرك يا سينا بينطق يشاور لي ع الاعداء بحر الرمال بيقابلني فيضان من الاحساس فرحك يا سينا النهاردة.. اتذكري «شدوان» اتذكري «كبريت».. والنصر ع الطغيان افتكري «رأس العش».. والمجد للانسان حيي رجال الرفاعي.. صياد ولاد الافاعي قومي اسمعيني باكبر ودمي.. للميدان وقلبي للمعركة ودراعي.. للبنيان انسان ف بحر الزمن عاشق كما الدراويش ابوس ايدين الوطن ولغيره ما باغنيش لو أملي بين النجوم اليأس ما يطولنيش اصبر لحد الزمن ما يقوللي: يا انسان عايز تعيش الحياة تعالي مصر.. وعيش