يا أهل مصر الكرام.. مليون تحية من قلبي ومليون سلام.. وفي أعياد الربيع.. بسلم عليكم كلكم وأقولكم.. ياريت نبطل كلام.. ونبص بقي لقدام.. ونسامح بعضنا ونطبطب علي قلبنا بحنيه.. ونحضن الأيام.. ونضم بلدنا بشوق ولهفة.. ونقولها وحشتينا يامصر كلنا.. يانعمة من ربنا.. ياأم الدنيا.. ياأصيلة.. ياغالية.. ياجميلة.. ياشمس طله من السما.. وأرض بترش الدفا والأمان والهنا.. ونور ينور خطوتنا وسكتنا.. وينادي علي الأحلام.. وثغرك الباسم راسم بعيونه الضحكة والهمسة وكلنا في حضنها وعلي أرضها نعيش في سلام. إسكندرية عروستي وفي أعياد الربيع.. لبست عروستي ومحبوبتي الجميلة إسكندرية.. فستان بديع.. أبيض بلون الندي.. والطرحة تزين حسنها.. يبتسم قلبها ويضحك الربيع.. وعقد فل مع ورد بلدي يغني لبلدي.. وروايحه تملا المكان وتفوح.. وتروح تسلم علي مطروح .. وتيجي تستني الأحبة والعشاق بضحكة بريئة.. زي ضحكة الطفل الوديع. أحلي أغنية يا إسكندرية.. ياماريه.. ياأحلي أغنية.. وشمسك الصابحة.. تلم في الطرحة.. وتهدي لزوارها الحب والفرحة.. وتقولهم أنا قلبي وعنيا لكم.. وشمسي وهوايا.. وبحري وسمايا بيحضن قلبكم.. ويقولكم تعالوا كلكم.. إتفسحوا وإتمتعوا وإضحكوا وأفرحوا.. دا الربيع خبط علي بابي ومستني ضحكة قلبكم.. المنتزه والهندزه ومع فرحتي تلقي الجناين مفروشة بغنا الأحباب.. تعالوا شوفوا المنتزه وهي متزينه بفن وهندزه.. تلقي الزهور تبتسم في سرور وبهجة والورد حواليها يداعب عينيها بهمس وشوق ولهفة منعشة.. وإن روحت المعمورة أوعي تنسي الصورة علي شطها.. مع الأهل والأصحاب.. ورسمايه صغيرة علي رملها.. وإذا كنت عايز شوية سمك حلوين يسروا القلب ويا العين أخطف رجلك لحد أبو قير.. حتلاقي السمك والجمبري بيصبح عليك بالليل.. وعيونه بتغني لشمس الأصيل. عاشت الأسامي ولو اتمشيت حبتين علي الكورنيش.. حتلاقي شاطيء ميامي.. بيقولك إتفضل ياغالي.. وعاشت الأسامي.. علي شطه نايم بير مسعود.. واللي محفور في ذاكرة الزمان من زمان من أيام الرومان.. وحكايته حكاية ورواية.. دا وش السعد والوعد للموعود.. والمولود.. ترمي فيه قرشك وتتمني.. عمره ما يغشك.. بس إنت بس استني علي حلمك تلقاه إتحقق ونلت المراد.. ودا كله في بير مسعود.. خليها في سرك.. واوعي تقول عليها لحسود.. أو حقود. أركب الحنطور وإن كنت ناوي تلف في إسكندرية وتدور .. وتقضي يومك بمتعة وسرور عليك وعلي الحنطور.. هو غالي حبتين بس أنت فاصل وفاضل.. وسيبك من البقشيش آهي فسحة وضحكة علي الكورنيش من المندرة لسيدي بشر لجليم.. وعلي كوبري ستانلي تغني آه يايللي مع علي الحجار وهو بيناجي إسكندرية في العصرية بشويش.. ويقول معاك تجيش نعيش.. وفي بحري والأنفوشي وراس التين تلقي الحنين.. مفرود بعمر السنين هنا المرسي أبو العباس والبوصيري وسيدي ياقوت.. يامحلا الضحكة لما تفوت.. تصلي ركعتين وتزور.. يفيض النور من عينيك ما بين الكلام والسكوت.. القلعة والمتراس والفسحة في القلعة ترد الروح وبأسرارها تبوح.. وتقولك أنا التاريخ العريق.. وكنوزي يعرفها عابر السبيل والطريق.. وفي حضني تلقي ترنيمه ولادي وأحفادي بيرم ودرويش وسيد حجاب وكلامهم اللي يرد الروح .. وإن كنت زرت أبو العباس والعطارين والأنفوشي وزيزنيا والمتراس هنا هتلاقي محبتي وضحكتي عالية فوق السما.. مرفوعة فوق الراس.. وبحري وشمسي وقمري وعمري وحجري ورملي شيلاه لأغلي الناس.. واسأل عني أمي إسكندرية دا هي الحضن والآهه والإحساس. الإسكندر المقدوني دي إسكندرية ياناس.. العروسة اللي بيحكي عنها الزمان من زمان.. من يوم ما جاها فارس الإغريق واليونان.. وسماها بإسمه.. وحط الرحال والرجال.. وقال.. أنا الإسكندر وإسمي مقدوني.. والأرض دي عشقي ولوني.. وسري ومكنوني.. وقال لكل الناس.. أنا الفارس.. أنا الحارس لأرضك وفوقها أحبابك.. أنا العطشان لحنانك.. وأرضك ويا وديانك.. وعمري ما كنت سجانك.. ياعروسة في قلب شطآنك.. وشط البحر عنوانك. حروف المعاني لما الربيع خبط عليكي.. أحس بإيديكي بتغسل بالفرحة عنيكي.. وشعرك جدايل مايل.. يرفرف يهفهف.. علي شطك وبحرك ويهدي فرحته ليكي..والحب حبات شوق.. أخدك في أحضاني.. أقول تاني.. ألاقي حضنك هنا تاني.. بيهديني.. بيرويني.. يناديني.. يدفيني.. ويشفيني من عتمة الضيق والألم والحزن.. من تاني تنسيني هموم الدنيا وأحزاني.. تعديني لبر أمان زي زمان.. ألقي الحنان إنسان.. يطبطب علي روحي وجروحي.. وفي حضنك أتمني تتحقق كل الأماني وأكتبها علي جبيني بكل الحروف والمعاني.. مركب ومرسيه إسكندرية ياعشاق.. دي مركب ومرسيه.. وميه صافيه هنيه.. في البحر جنيه.. وشرفت علي البر بحب وحنيه.. ومشيت بجمال ودلال.. وقالت بعلو الصوت.. أنا بنت مصر.. العروسة الجميلة الأصيلة عروسة كل البحور.. وجيت بالنور أهديه لأحبابي بكل حكمه ورويه. والله عليكي ياإسكندرية.. لما ألقي الضحكة في عيونك.. وفي عيون محبوبك.. ألقي الدفا في جفونك.. مسكون في مكنونك.. وبيقولك بحبك.. بكل حرف من إسمك .. وبكل كلمة في رسمك.. أنا إسمك.. أنا رسمك.. أنا ألمك.. أنا همك.. أنا ألفك.. أنا نونك.. أنا ياحتة من الجنة.. أنا عقلك.. أنا جنونك.