عبداللطيف نصار ردت ابنة السيدة فيروز المخرجة ريما الرحباني على المقال الذي نشر مؤخراً على احدى المجلات اللبنانية، وتضمن العديد من الإساءات للسيدة فيروز، وكتبت الرحباني عبر حسابها الخاص على أحد موقع التواصل الاجتماعي التالى: كل إنسان كبير أوعظيم بأخلاقو وشخصيّتو ومواهبو ووطنيتو وعطاءاتو وإنجازاتو وتضحياتو، بيخِلق من حولو كميّة حسّاد بِ عقَد نقص ما بيعرفوا كيف يداووها إلا بمُخيّلة بتضاهي ببشاعتا ضعفُن وفشلُن، فَ بِيلفّقو أكاذيب وإفتراءات، ظنًّا منهن إنّو بهالطريقة بيحجّمو عظمتو وبيخفّفوا من حب الناس إلو. هاي وجه من طبيعة الإنسان العاطلة والحسودة والحقودة، اللي بتِعلق بدوّامة الفشل والحسد والخُبث، هلقد بيكون فاشل صاحبها إنّو ما بيعرف يعمل شي إلا تركيب وتلفيق الأخبار ع كل إنسان ناجح وكبير، تيحاول يخفّف من وطأة وهجو أو تيتعربش ع إسمو وينشهر، كونو نكِرة، فيظن إنّو مُجرّد ما يتطاول على هالإسم الكبير، بيتحوّل من نكِرة لَ بطل.. فيروز عندا ماضي حافل بتركيبات أهل البيت والأقارب والعقارب وغيرو، اللي كانت تِنحاك ضدها مع حبيب مجاعص وغيرو، وتِتْعمّم بكواليس الإعلام وغيرو، وعلى موائد الأكل، لتُنشر وتَنتَشِر، وتِرجَع تِظهر من حين لآخر، بأشكال وتحت أسماء مختلفة، الهدف منها واحد: محاربة فيروز وكسرها وبفرد حجر النَيْل من عاصي. إيه وقتا يا إخوان ما نفعت، هلّق بدّا تنفع؟؟؟ إمّا محاولات تسييس فيروز فَ كلّا فاشلة، لأن إذا في نُبل وحَق وكَرَم و كرامة بهالدني، عنوانُن فيروز وعاصي، بالحياة وبالفن، هنّي البيت وهنّي الوطن الوحيد الحقيقي والراقي ما بتقربلو السياسة ولا بيعرفا. العظماء بالتاريخ يا إخوان ما بيِتبَعوا إنّما يُتبَعوا. وهنّي اللي بيسطروا التاريخ وبيِصنَعوا قوالب ومقاييس القِيَم والمواقف، وبعاد كل البعد عن حروب الزغار. اذا فكركن أدوات وإرهاب داعش بس بالبواريد والمتفجرّات غلطانين كتير، داعش كمان بيلبسوا بدلات وعندن مراكز ومكاتب ومنابر وظيفتها تحطيم وتهشيم الحضارات وكل وج مشرق. كل عمرا الكلاب عم تنبح والقافلة عَمْ تَسيرْ.. وسارت هالقافلة بثبات ونُبل ورُقي وصَمت وترَفُّع لدرجة إنها صارت فوق فوق مطرح اللي بيوقف الزمان! لذا مهما كتروا وتنوّعوا الكلاب اللي عم يِنبَحوا ما عاد نباحن يطالْ. وليسمع من يسمع هوّي ومعلّمينو وفاتّينلو المال. أسفي على دولة مؤسسّاتا غرقانة بالزبالة والفساد ورجالها ضالين.. هاي إذا بعد فيها رجال. ويا وزير الثقافة ووزير الإعلام ونقيب الصحافة هيدا اللي عم بيصير بأيّامكن على مرآكم ومسمعكم! وكلمة إخيرة لإصدقائي الفيروزيين ولإخوتي الحقيقيين، ما تزعلوا، الكلاب بتخلّف جراوي كتير، ورح يضل في نباح كتير، بس محبّتكن وإيمانكن بالوطن الفيروزي أقوى من كل شي. تضلوا بخير.ريما عاصي الرحباني.
- موضوعات ذات صلة: مواقع التواصل الاجتماعى تثأر ل"جارة القمر".. عشاق فيروز يطالبون برأس "صبرا" ومصادرة "الشراع" http://arabi.ahram.org.eg/NewsQ/68036.aspx إعلاميون لبنانيون: فيروز حضارة فنية أكبر من تاريخ http://arabi.ahram.org.eg/NewsQ/68037.aspx إليسا: فيروز ثقافة وأمة ومن يهينها يهيننا جميعا http://arabi.ahram.org.eg/NewsQ/68038.aspx الإعلامية هلا المر ترد على "صبرا": فيروز هي نحن يا صاحب القلم الأسود http://arabi.ahram.org.eg/NewsQ/68039.aspx آمال فهمي تكذب "الشراع" اللبنانية: فيروز لا تشرب الخمر ولا تصاحب الأغنياء http://arabi.ahram.org.eg/NewsQ/68035.aspx حلمي بكر يطالب بقطع ألسنة مهاجمي"فيروز" لأنها رمز لبنان http://arabi.ahram.org.eg/NewsQ/68043.aspx مفيد فوزى: مطبوعة هابطة تحاول النيل من فيروز.. والشرنوبي: لماذا يستكثرون عليها العيش فى هدوء؟ http://arabi.ahram.org.eg/NewsQ/68034.aspx
