الشعر أصل الحكاية و مبتدى الأفعال و الفكرة تشبه فراشة طبعها الترحال كان حلمى أكتب قصيدة تفوق جميع ماتقال الحلم معاندنى و الشعر مش بالكيف فى كلمة تنفع دوا و كلمة تنفع سيف و كلمة زى الرصاصة و كلمة ريحها خفيف الكلمة جايز تعيش لو حد صدقها الكلمة ممكن تموت لو يوم يصيبها الزيف! كان نفسى أعيش فى الصعيد أسهر فى قاعدة سمر و اصحى على نيلُه كان نفسى أكون صياد بينام على قارب و أراقب الملكوت و أغزل خيوط ليلُه كان نفسى أكون درويش و يصطفينى الإمام بأنى أرعى المقام و أسرج قناديله كان نفسى أشوف النبى و أسنلُه سيفه طب مين فى دنيتنا بيعيش على كيفُه؟ «فواصل» فاصل 1 دافن جراح جوه الضلوع ماشى ف طريق مفيهوش رجوع عايش حياة من غير دموع جفن العيون شبعان جفاف و الحزن واصل منتهاه من قلة الإحساس يخاف لحسن يكون ميت بيحلم بالحياة فاصل 2 يارب يا عالم إنى منيش ظالم و تملى أبات مظلوم ارزقنى قولة الحق شيل من دماغى ال...لأ و راضينى بالمقسوم. فاصل 3 طريق طويل ممتد فاضى و مفيهوش حد حاولت أشوف آخره بس النظر ع الأد طريق طويل أخضر عمران و متَنَّور حاولت أنا أسلكه لقيته متسَوَّر فاصل 4 العين بتضحك و أتارى القلب متكدر تفاحه حمرا ولكن قلبها أخضر و تلقى فيه أحزان طول عمرها ما تبان و ياما فيه أحزان عن نفسها تعبَّرْ