ايام مش من زمان أوي مليانة شخوص و حواديت و تفاصيل كل ما تيجى تضيع مني كل مااجى أضيع لازم .. ارجع على قد ما اقدر لازم ارجع و اكون سريع: ارجع صبي قاعد مع الاسطي ف محل الترزي وانشغل معاه بالتفصيل القماش كتير و زباين شارعنا طلباتهم اوامر مدام سهير ام رامي و مدام عفاف و المقدسة فايزة و الحاجة فوزية مرات الحاج عامر و انا من صغري رغم حبى للكرة و الشهرة لكنى أحب أكتر اكون مغامر اكون مبدع ف المشاعر اخلقها و اصدقها و بدل ماتطير منى بصوابعى الزقها و افرزها وبقلبى احايلها و اطبطب عليها واطرزها تسكن ف الباطرون: يا اهلا لكل مخلوق ف شارعنا و لكل مخلوقة ونستنا جلابية و طرحة و بنطلون ايام حقيقة و قيّمة ومْعلِّمة و مْسلِّمة الصبح يبدأ زى مايبدأ الديك يصيح او ينسي من اى عشة نواحينا من عند اى جار بلدينا لازم تلاقى طلة حلوة تشبه للامان تشبه للبيبان اللى ماقفلناهاش باليل طالعة تشكر خالقها طالعة توضب غسيل امبارح و مش لازم تفتكر اللى مزعلها ماهو عدى مع الهوا م الفراندا و السما تفتح تبقى جنة و تبقى خيمة و تبقى ومضة و كله نازل على شغله يللا و الشارع فجأة يبقى لوكاندا و قلوبنا اوض من غير أرقام و مفيش دفاتر ولا إمضا ولا مفاتيح والولد رايح على مدرسته و البنت شقية و لمضة لكن بأدب و الأسفلت المندي فاكر يا جدو فاكر يا جدي بيوسع وبيعدي الكل مش لازم قرايب لكن فيه صلة اوقات تلاقيها بطيئة و اوقات مستعجلة رايحة ولازم ترجع ساعات تلاقيها مكملة وساعات غصب عنها مأجلة ايام جوايا كده و الاسطى لما لاقانى كده رقاني وخلانى دراعه اليمين وقال لى : كمل و اوعى تِعْطل انا جبت لك ماكنة مخصوص عشان تفصّل