هدي أنوار العيون يعني غمض انت مجنون أمنيات اقفل الشبابيك وهات... ورد أسعد سافر البحر اللي مستنيك, من الصيف اللي فات بس ساب لك ضل شمسية ونسيم خلي صوت الموج يغني: ياللي مجنون بالتمني سافر الحلم القديم, اللي مستنيك من الحلم اللي فات لما قال لك: بص للعالم بقلبك بابتسامة بنت عايشة العمر جنبك بص للعالم وحبه واكرهه واخطفه من شعر تاني يا حبيبا زرت يوما أيكه لم أجد إلا الأغاني وام كلثوم اللي ساكنة الراديوهات قاعدة ويا الجدة في الدور الفوقاني كل حواديتهم آهات... تنهيدات صوتهم الهادي يشقر... ع البنات يا حبيبا زرت يوما بيته في الملك المظفر... ذكريات راديو بيخروش وعالي قال لي غنوة وأهداها لي يا قمر من غير ليالي لا أبالي بالسهر.. وياك هناك يا قمر يا غريب وشايب ليه تفرط في الحبايب تبقي خايب.. في سماك تبقي دايب في الثواني تبقي تايه والأغاني بتنتهي وما بتنتهيش أم كلثوم اللي قالت للهوا خليني أعيش ردت الشيش في الإمام... لما شمس الضهر شدت ردت الغنوة يا وردة.. حب صافي وانسجام والعيال ناموا في سلام وانت منهم, والا صاحي قول في سرك بسمك اللهم بارك في صباحي اشرب الشاي باللبن ويا ابتسام وابتدي نطق الكلام ابتدي بنشيد بلادي واحضن العالم ونادي... للحمام ثم ييجي الليل هدية ينكشف لك أغلي سر تبقي شايف كل أحلامك بتمشي.. .. فوق إيقاع القلب تسكن ع الشفايف تملا كل الدنيا شعر.